A chôu phut trâm mâ mâu Kăn teăng mâ kong têa Malaysia, pôa Phạm Minh Chính, Ngế pro xiâm hnê ngăn Chin phuh hiăng hâk kơdĕn pôa Dato Tan Yang Thai, Kăn teăng mâ kong têa Malaysia  tơdah xo hnoăng cheăng a tơnêi têa Việt Nam ƀă pói rơhêng vâ pêi pro tro tŭm mâu hnoăng cheăng ki tơná pêi, pôa kô pơtối mơdêk hnoăng cheăng cho ki xiâm vâ tơdjêp ki kal khât vâ thăm mơdêk tơrŭm cheăng kố pơtối châ mơnhông rế hía rế trâu tơdâ ƀă châ tơƀrê.

A chôu phut tơdah Kăn teăng mâ kong têa Kul a Việt Nam, pôa Phạm Minh Chính hiăng rơkâu hâk kơ jâ Chea Kimtha châ pro Kăn teăng mâ cho ngế kơdrâi ki apoăng dêi kong têa Kul a Việt Nam; rơkâu mâu hnoăng cheăng ki kân kĕng ‘na tơrŭm tơpui kâ tung tơnêi têa ƀă kong têa ê ki kong têa Kul hiăng châ chiâng pêi pro tung mâu khế hơnăm hdrối mê hía nah. Ngế pro xiâm hnê ngăn loi tơngah kong têa Kul kô tơkŭm po ƀlêi chiâng hneăng tâ phĭu rah xo kăn Kuô̆k hô̆i má 7 ƀă Hneăng tơ’noăng ivá Đông Nam Á roh má 32, vêh mơnhên Việt Nam kô hbrâ vâ tŏng kum, tối tơno mâu tơdroăng ki rơkê hlê plĕng vâ Kul tơkŭm po ƀlêi chiâng hneăng tơ’noăng ivá tung kơpong ki kal kân kố.

Pôa Phạm Minh Chính pâ thế péa pâ pơtối kơdo mơ-eăm tơpui tơno vâ tơleăng mơnhên 16% troăng tíu tơkăng kong ki prôk chêng, xua hdrối nah tá hâi teăm tâp tơneăn vâ mơjiâng troăng tíu tơkăng kong ki hơniâp lĕm, tơrŭm, nhŏng o ƀă mơnhông; tơdrêng amê, pâ thế peăng kong têa Kul pơtối tŏng kum, veăng pêi, chêh bro hlá mơ-eá tro tiô luât kuăn pơlê Việt Nam ki rêh ối a kong têa Kul, tŏng kum tơ’lêi hlâu ăm kuăn pơlê Việt Nam ki rêh ối a kong têa Kul châ pêi cheăng kâ, rêh ối tơniăn a kong têa Kul.