Kơxê măng lơ 06/4, a Tíu pêi cheăng Ƀơrô Chin phuh, Pôa Phạm Minh Chính, Ngế pro xiâm hnê ngăn Chin phuh hiăng tơdah Ngế pro xiâm phŏ hnê ngăn kong têa Rusi Dmitry Chernyshenko dế ai roh lăm pôu pêi cheăng a Việt Nam  ƀă rơtế pơkuâ Hneăng hôp roh má 24 Viƀan Chin phuh Việt Nam – Rusi ‘na tơrŭm cheăng kâ – tê mơdró ƀă khoa hok – kih thuât sap ing hâi lơ 05 troh hâi lơ 07 khế 4 hơnăm 2023. A roh tơdah, pôa Phạm Minh Chính mơnhên Chin phuh Việt Nam đi đo nhuô̆m tơrŭm nhŏng o tiô khôi vâi krâ nah ƀă tơrŭm lĕm tro tung hiêm mơno Khu tơrŭm cheăng ton xŏn Việt Nam – Rusi.

Péa pâ kheăn kơdeăn mâu tơdroăng châ tơƀrê tung tơrŭm cheăng pơla péa pâ tung pơla kố nah ƀă tơdroăng tơrŭm kal kí châ rak, tơrŭm tung mâu kơvâ cheăng tiô khôi vâi krâ nah châ thăm mơnhông mơdêk; mơnhên Hneăng hôp roh má 24 Viƀan Chin phuh Việt Nam – Rusi cho roh tơ’lêi vâ péa pâ tơpui tơno, môi tuăn mâu troăng thăm tơrŭm cheăng pơla péa pâ, xuân môi tiah mơjiâng tơdroăng ki nếo vâ pêi pro châ tơƀrê mâu tơdroăng tơkêa bro tơrŭm tung la ngiâ.