A rôh tơpui phôn, pôa Phạm Minh Chính, Ngế pro xiâm hnê ngăn tơnêi têa mơnhên tối ivá mơ-eăm dêi pôa Anwar Ibrahim, Ngế pro xiâm hnê ngăn Malaysia xuân môi tiah dêi Malaysia tung hnoăng cheăng pro Kăn xiâm hnê ngăn ASEAN tung mơdêk pơkâ tơleăng mâu tơdroăng hơkăng a tíu tơkăng kong pơla Kul – Siam; maluâ hiăng tơkŭm po rôh trâm pơla Ngế pro xiâm hnê ngăn kong têa Kul ƀă Ngế pro xiâm hnê ngăn kong têa Siam ki pơtân hâi lơ 28/7 kố nah ƀă hiăng châ tơpui rơhéa pơtê tơplâ, cho hvêa prôk ki kal apoăng gum mơdât hơkăng pơla péa tơnêi têa.

Tơpui ‘na tơrŭm cheăng pơla péa pâ, péa Ngế pro xiâm hnê ngăn kong têa môi tuăn kô pơtối pro trâu hngế tâ nếo tơrŭm cheăng tung la ngiâ tŭm têk, tung mê, tơkŭm mơdêk tơrŭm cheăng pơhlêh nếo tơmiât pêi rơkê, khoa hok kong ngê̆, on tơhrik, troăng mơ’no hyôh on tơhrik pơla Việt Nam-Malaysia, Singapore vâ pro troăng on tơhrik ASEAN; rĕng kĭ tơkêa ‘na tê mơdró phái vâ Việt Nam ai tŭm phái vâ gum Malaysia.