Xông tơpui a tíu tơkŭm po, pôa Phạm Minh Chính, Ngế pro xiâm hnê ngăn tơnêi têa tối nhên, nôkố Việt Nam dế rak tơniăn cheăng kâ kân, pơkuâ liăn chu rơpâ yă, tơniăn chĕn liăn tơnêi têa, mơ’no liăn ngân tơnêi têa châ péa xôh, chĕn kong têa ê, chĕn Chin phuh tung kơlo ăm phêp; tơniăn krê, hnoăng pơkuâ, tâi tâng tơnêi tơníu châ rak krá, tơniăn lâp pơlê pơla, kuăn pơlê ai cheăng pêi, rak vế kong prâi tơdâng châ tơniăn; mơdêk tơdroăng cheăng hbrâ, mơdât kâ kơhveăm liăn ngân; tơdroăng tơpui kâ ƀă kong têa ê châ hên tơdroăng châ tơƀrê.

Tung la ngiâ, ‘na pơkâ pêi xiâm, Ngế pro xiâm hnê ngăn tơnêi têa tối nhên, pơkâ pêi cheăng ton xŏn: mơ-eăm troh hơnăm 2030 (leh tơbâ 100 hơnăm mơjiâng Đảng) cho kong têa dế mơnhông, ai kơmăi kơmok tiô rơxông nếo, pêi lo liăn tơdâng hên; troh hơnăm 2045 (leh tơbâ 100 hơnăm mơjiâng Tơnêi têa) cho kong têa mơnhông, pêi lo liăn hên.

Hơnăm 2024 châ mơnhên cho hơnăm tơtêk rơdêi, tơtêk hluâ pơkâ, ai kơnâ kal khât tung tơdroăng pêi pro ƀlêi trâng Pơkâ pêi 5 hơnăm 2021 – 2025 ƀă Troăng pêi cheăng ton xŏn 10 hơnăm 2021 – 2030, tung mê, tơdroăng châ tơƀrê 2024 thế lĕm tâ hơnăm 2023 môi tiah hnê mơhno dêi pôa Nguyễn Phú Trọng, Kăn xiâm pơkuâ hnê ngăn Đảng.