Xông tơpui a roh tơdah, pôa Phạm Minh Chính, Ngế pro xiâm hnê ngăn tơnêi têa loi tơngah roh lăm pôu pêi cheăng kô châ tơƀrê lĕm, mơjiâng ivá mơdêk tơrŭm nhŏng o tiô khôi vâi krâ nah ƀă tơrŭm hên kơvâ cheăng Việt Nam – Phần Lan.

Ngế pro xiâm hnê ngăn tơnêi têa tối troh Kăn xiâm hnê ngăn Kuô̆k hô̆i Phần Lan ‘na troăng tơpui kâ ƀă kong têa ê xuân môi tiah mâu troăng pơkâ pêi, troăng hơlâ ƀă tơdroăng châ tơƀrê mơnhông cheăng kâ – rêh ối pơlê pơla dêi Việt Nam; pâ thế Kuô̆k hô̆i Phần Lan môi tuăn tơdroăng cheăng Vi ƀan châu Âu (EC) rĕng tah lôi ‘’theh trĭng’’ (IUU) ƀă ká xi xŏng Việt Nam; mơdêk cheăng Kuô̆k hô̆i mâu kong têa ối tung khu tơrŭm EU rĕng kĭ Pơkâ tŏng kum mơ’no liăn cheăng Việt Nam – Khu tơrŭm châu Âu (EVIPA) ƀă loi tơngah EVIPA kô kum khu tê mơdró rêm kong têa châ achê kơchơ mơdró dêi pó ƀă kơpong.

Pôa Phạm Minh Chính, Ngế pro xiâm hnê ngăn tơnêi têa pin xuân pâ thế péa pâ hriăn plĕng mâu tơmeăm ki ai hlâu tơrŭm hnê hriâm nếo ‘na hnê cheăng pêi, tối ăm dêi pó túa ki rơkê tơtro mơjiâng tơdroăng hnê hriâm châ tơƀrê hên, pro tơ’lêi hlâu ăm kuăn pơlê Việt Nam rêh ối, pêi cheăng kâ ƀă hriâm tâp tơniăn a Phần Lan, kum mơnhông hnoăng kông tơdjêp tơrŭm nhŏng o ƀă tơrŭm pơla péa tơnêi têa.