Pôa Phạm Minh Chính, Ngế pro xiâm hnê ngăn Chin phuh hiăng pơkuâ roh pêi cheăng ƀă Ngế pro xiâm hnê kong têa Kul ƀă Ngế pro xiâm hnê ngăn kong têa Lếo klăng roh lăm pôu păng ‘nâng kong têa Malaysia, veăng mâu Hneăng hôp. Tung tơdroăng pêi cheăng lĕm tro ƀă pâ dêi pó, pái Ngế pro xiâm hnê ngăn tơnêi têa hiăng tơpui tơno ‘na mâu kơvâ tơrŭm cheăng tơdjuôm ƀă mâu tơdroăng lâp plâi tơnêi, kơpong rơtế tơmâng.

Pái Ngế pro xiâm hnê ngăn tơnêi têa môi tuăn mơnhên hên roh tơ’lêi hlâu tơrŭm cheăng pơla péa pâ ƀă pơla pái pâ Việt Nam – Kul – Lếo hiăng ƀă dế mơnhông châ tơƀrê, kum hên tung tơdroăng pro krá tơniăn ƀă tơbêng ăm tơrŭm cheăng pái tơnêi têa. Pái Ngế pro xiâm hnê ngăn tơnêi têa tối rơdêi tơdroăng rak ƀă mơnhông khôi túa vâi krâ nah tơrŭm môi tuăn, tŏng gum dêi pó pơla Việt Nam ƀă Kul – Lếo thăm kal khât ƀă kal păng ‘nâng tâ, cho môi tung mâu pơkâ ki xiâm mơdêk tơrŭm krá tơniăn pơla pái tơnêi têa.