Ƀă inâi: “Tơ’noăng rĕng, tơƀrê mơjiâng khu Kŏng an kuăn pơlê krúa, rơdêi, chính quy, ƀê̆ng ƀeăn, rơkê”, Hneăng hôp Tơ’noăng “Xua gâk kring Tơnêi têa” rôh má 9 xua Khu xiâm Kŏng an tơkŭm po a kong măng lơ 6/8, a Hà Nội. 246 ngế ki rơkê, teăng mâ ăm lối rơpâu ngế ki rơkê, lối rơtuh ngế “ngế ki rơkê, cheăng rơkê” tung Tơdroăng Tơ’noăng “Xua gâk kring Tơnêi têa” ƀă tơdroăng “Tâi tâng kuăn pơlê gâk kring Tơnêi têa”, Ngế khên tơnôu khu lêng kring vế kuăn pơlê ƀă mâu lêng ki tơ’noăng tung lâp tơnêi têa veăng ai mâ a hneăng tơ’noăng.

Tơpui a hneăng hôp, pôa Phạm Minh Chính, Ngế pro xiâm hnê ngăn Chin phuh tối rơdêi, mâu tơdroăng pêi pro tơƀrê, kơhnâ dêi kŏng kuăn pơlê hiăng veăng gum kal khât rak vế tơniăn kal kí, mơjiâng pơlê pơla rế hía rế rơkê, tơniăn, rơdêi, tơdroăng rêh ối kuăn pơlê hơniâp lĕm, hơniâp ro, phâi hơtôu, pro chiâng tơdroăng ki tơ’lêi hlâu ăm mơnhông tơnêi têa.

Ƀă hên túa pơkâ pêi, tơmiât pêi rơkê, Tơdroăng tơ’noăng “Xua gâk kring Tơnêi têa” hiăng mơdêk rơdêi tơdroăng pơhlêh nếo, tơmiât pêi rơkê, tơbleăng pêi mâu troăng hơlâ gâk kring rơkê plĕng, tơƀrê; veăng gum pêi pro klêi tơdroăng cheăng tung la ngiâ gâk kring, tơniăn; mơdêk tơdroăng ki veăng tung lâp lu, kơhnâ rơkê dêi khu lêng Kŏng an kuăn pơlê pơtối rak vế Tơnêi têa. Ngế pro xiâm hnê ngăn tơnêi têa pơkâ thế mâu Kŏng an kuăn pơlê pơtối mơdêk khôi hmâ, tơrŭm, tơ’noăng pêi pro tro hnoăng cheăng mơjiâng gâk kring kuăn pơlê, rak vế tơdroăng gâk kring kuăn pơlê tro ƀă hiâm mơno kuăn pơlê krá rơdêi; gum tơniăn gâk kring kal kí, tơniăn tung lâp pơlê pơla, rak vế tơdroăng ki hơniâp lĕm, tơniăn vâ mơnhông tơnêi têa.