Tung 30 hơnăm hdrối, tơrŭm cheăng pơla Việt Nam ƀă ADB đi đo ‘mâi mơnhông tơƀrê; malối cho tơrŭm cheăng teăm tơdrêng, ai pơxúa dêi ADN ‘măn ăm Việt Nam tung hơnăm plâ mơdât pơreăng COVID-19, mơdêk ‘mâi mơnhông cheăng kâ - rêh ối. Pôa Phạm Minh Chính - Ngế pro xiâm hnê ngăn tối, Chin phuh Việt Nam ngăn ADB cho môi tung mâu khu tơrŭm cheăng mơnhông tơƀrê kal khât, hlối hmâ, loi nhoăm; ăm ‘nâi klêi kơ’nâi lối 35 hơnăm pơ’lêh nếo, Việt Nam hâi la lâi châ mơnhông, ai tơmeăm khoăng, ki rơdêi ƀă lâp plâi tơnêi nhoăm môi tuăn nôkố.

Tung tơdroăng cheăng mơnhông dêi Việt Nam ai veăng tơrŭm, tŏng kum tơƀrê dêi ADB. Ăm ‘nâi, kơ’nâi 30 hơnăm tơrŭm cheăng pơla Việt Nam - ADB rế tơƀrê tâ tŭm tơdroăng cheăng, Ngế pro xiâm hnê ngăn tơnêi têa pơkâ tung mâu hơnăm kố, tơrŭm cheăng pơla Việt Nam - ADB kal pơ’lêh nếo tơkŭm ‘no liăn mơnhông tơƀrê, ai xiâm, ki kal tâ; luât pơkâ, tơdroăng pro hlá mơ-éa thế pơ’lêh nếo, ƀă tuăn tơmiât, túa pêi cheăng ki nếo tâ vâ pro pơxúa hên tâ.