Khĕn kơdeăn ki rơdêi, hnoăng veăng ‘no dêi mơngế Việt Nam akố, mơjiâng pơlê tơnêi têa ƀă tơdroăng tơrŭm cheăng pơla Việt Nam - New Zealand, Ngế pro xiâm hnê ngăn Chin phuh pơkâ thế mơngế Việt Nam a New Zealand môi tuăn dêi rơpó, ing tơdroăng “mâu ki kro kum mâu kơtiê, mâu ki kơtiê kum mâu ki pá puât tâ nếo’’, “ Mâu ngế prôk hdrối kum mâu ki prôk kơ’nâi” vâ rơtế ƀă dêi rơpó mơnhông tơƀrê, mơjiâng môi khu khu pơlê tơrŭm môi tuăn mơnhông tơƀrê, rơdêi.

Ngế pro xiâm hnê ngăn tơnêi têa púi vâ kuăn pơlê mơdêk ki môi tuăn dêi rơpó ki lĕm dêi hdroâng mơngế ƀă veăng ‘no hnoăng mơnhông tơƀrê a tíu tơná ối, pơtối pro kông ki tơdjêp rế ton rế krá tơniăn tung tơrŭm pơla péa pâ; rak tơniăn, pơtối rak túa lĕm tro dêi hdroâng kuăn ngo, rơkong tơpui nâl Xuăn; ƀă hên tơdroăng pêi pro ai pơxúa tâ nếo tơmiât troh mâu ki xiâm ai hnoăng, veăng ‘no tung mơjiâng ƀă mơnhông tơƀrê tơnêi têa.