Kơxo lơ 13/1, pôa Phạm Minh Chính, Ngế pro xiâm hnê ngăn tơnêi têa veăng hôp ƀă tơpui hnê mơhno a Rôh hôp mơgêi kơvâ pêi chiâk pêi deăng, xua Khu xiâm ngăn chiâk ƀă Mơnhông thôn pơlê tơkŭm po. Hơnăm hdrối, kơvâ pêi chiâk pêi deăng hiăng châ hên mâu tơdroăng ki kal. Pêi pêt kế tơmeăm tá pêi chiâk pêi deăng, loăng, ká xi xŏng xuân ối rak vế tơniăn. Tung mê, pêi kế tơmeăm tâk 3,36% tâng pơchông ƀă khế kố hơnăm nah; tê kế tơmeăm ngi kong têa ê va chê 7 rơtuh tâ̆n phái ƀă hên kế tơmeăm pêi lo ing chiâk deăng xiâm ki ê ƀă tâi tâng kơxô̆ liăn châ xo lối 53 rơtal dollars.

Tơpui a rôh hôp, Ngế pro xiâm hnê ngăn tơnêi têa pơkâ thế, hơnăm 2023, Khu xiâm ngăn chiâk deăng ƀă Mơnhông thôn pơlê ƀă tâi tâng kơvâ pêi chiâk pêi deăng, thôn pơlê athế loi tơngah khên tơnôu, rah xo mâu hnoăng cheăng, troăng hơlâ tơƀrê. Tung mê, kal mơdêk rơdêi xúa kơmăi kơmok, hơ’lêh kơxô̆ ƀă xúa khoa hok kơmăi kơmok chal nếo, rơkê tung pêi pêt kế tơmeăm; mơnhông pêi chiâk deăng hưh cơ, kế tơmeăm pêi lo ing chiâk deăng krúa; mơnhông xúa kơmăi kơmok kum tung pêi chiâk deăng, kơmăi kơmok uâ pơliê kế tơmeăm mơnhông kơpong tơrŭm pêt tơtro ƀă kơpong kế tơmeăm, mâu túa pơkâ tơrŭm pêt, uâ pơliê tơdjêp ƀă tơdroăng ki tê roê tung tơnêi têa ƀă lâp plâi tơnêi.