Tung pơla lăm pôu, pêi cheăng a kong têa Hàn Quốc, tiô rơkong krếo thế dêi mâu kơ koan ki hnê mơhno rak vế luât Hàn Quốc, a hâi lơ 7/4, Đăi tươ̆ng Tô Lâm, Ngế xiâm ngăn kŏng an ƀă khu kăn râ kăn xiâm Khu xiâm ngăn Kŏng an hiăng troh koh tơpui tơno ƀă pôa Han Duck Soo, Ngế pro xiâm hnê ngăn kong têa Hàn Quốc.

A chôu phut trâm mâ mê, pôa Han Duck Soo vêh mơnhên tối tơrŭm cheăng ki krá tơniăn ton tung hên kơvâ cheăng pơla péa pâ tơnêi têa, tung mê, mơdêk tơrŭm tê mơdró kâ pơla péa pâ rế hía rế châ mơnhông mơdêk. Tung hơnăm 2022, hiăng ai lối 700 rơpâu ngế Hàn Quốc troh a Việt Nam lăm ôm hyô ƀă dế nôkố, kuăn pơlê Hàn Quốc  dế tê mơdró kâ a Việt Nam rế hía rế thăm mơdêk hên.

Pôa Tô Lâm koh mơnê kơ pôa Han Duck Soo hiăng mơdoh chôu phut tơdah khu kăn, vêh mơnhên, Việt Nam đi đo ngăn Hàn Quốc cho ki xiâm tơrŭm ki kal má môi tung rếm kơvâ cheăng kâ, rêh ối, ‘na tơdroăng cheăng kal kí, tơrŭm tơpui kâ, kring vế, gak ngăn lêng ƀă hên mâu tơdroăng ki ê. Tung mê, tơrŭm cheăng lêng cho ki xiâm kal khât tung tơrŭm pơla peá pâ tơnêi têa; klêi mê vêh mơnhên tối, Việt Nam veăng vâ kring vế hơniăp lĕm, tơniăn a kopong ƀă lâp plâi tơnêi, tung mê ai chuăn Triều Tiên.