Kơxo lơ 14/4, a tíu pêi cheăng Xiâm tơnêi têa, pôa Tô Lâm, Kăn xiâm pơkuâ hnê ngăn cheăng Đảng, Ngế xiâm pơkuâ Khu hnê mơhno cheăng pơkuâ po rôh hôp má 3 Khu hnê mơhno cheăng Tơnêi têa ‘na mơgêi Pơkâ 18 hâi lơ 25/10/2027 dêi Khu xiâm pơkuâ hnê ngăn Tơnêi têa hneăng 12 mâu tơdroăng ‘na pơtối pơhlêh nếo, xing xoăng tơkŭm kơ koan cheăng dêi khu pơkuâ tơdroăng kal kí iâ, pêi cheăng xêt tơƀrê vâ tơpui tơno, tơbleăng mâu túa pơkâ dêi Khu hnê mơhno ‘na pêi pro xing xoăng, tơkŭm tíu pêi cheăng râ kong pơlê, râ cheăm ƀă mơjiâng khu pơkuâ tơdroăng kal kí 2 râ a kong pơlê.

Mơgêi rôh hôp, pôa Tô Lâm, Kăn xiâm pơkuâ hnê ngăn cheăng Đảng tối nhên troh nôkố rôh kăch măng ‘na pro lế lĕm kơ koan cheăng kal kí châ hên kuăn pơlê tung tơnêi têa ƀă kong têa mơnhên tối khât ƀă kố cho tơdroăng ki rơkê kơnía vâ pin tơbleăng trâu rơdâ tâ nếo rôh kăch măng ‘na pro lế lĕm kơ koan cheăng tro tơdrăng Rôh hôp Tơnêi têa rôh má 11 pơla hdrối nah.

‘Na hnoăng cheăng tung la ngiâ, Kăn xiâm pơkuâ hnê ngăn cheăng Đảng tối nhên tơdroăng cheăng ối hên, tơdroăng pêi pro sap ing tơnêi têa troh kong pơlê ƀă ai tơrŭm tơdjâk krá tơniăn ƀă dêi rơpó xua mê kăn xiâm pơkuâ hnê ngăn cheăng tối tiah kố, tơdroăng ki tơrŭm xua tơdroăng pêi tơdjuôm cho tơdroăng ki kal; tung mê ai khu tơdroăng cheăng ki chêh pro klêi hlá mơ-éa luât, ‘na tơdroăng ‘mâi pơhlêh, tơdroăng ‘mâi rơnêu pêi pro klêi tơdroăng luâ, pêi klêi mâu pơkâ dêi Đảng athế prôk hdrối môi hvêa chêng vâ pro tíu pêi cheăng luât krá rơdêi ăm tơdroăng pêi pro tơdrăng ƀă tơƀrê.