Kong pơlê Gia Lai dế mơdêk rơdêi pro rế lĕm tíu pêi cheăng râ cheăm tiô troăng hơlâ rah iâ mơngế pro rế lĕm, kơdroh ing 218 tíu cheăng chu ối 77 tíu pêi cheăng, pro xiâm ăm mâu kăn péa râ pêi cheăng ai pơxúa, tơbrê tiô tơdroăng tơkêa bro hiăng tơbleăng, túa pêi cheăng mâu kăn cheăm ki nếo dêi Gia Lai ai kơxô̆ mơngế pêi cheăng riân 32 ngế rêm cheăm (ôh tá riân khối Đảng, khu grup).

Mâu kăn pơkuâ râ cheăm nếo xúa pêi tiô pơkâ tơdâng râ tơring nôkố. Lâp mơngế pêi cheăng ton hơnăm râ tơring nôkố kô pơtroh lăm pêi cheăng a râ cheăm nếo vâ pro xiâm ăm khu pêi cheăng mơdêk hnoăng cheăng pêi. Tơdrêng ƀă rah iâ mơngế cheăng, pro rế lĕm mơngế pêi cheăng ăm tơnêi têa, kong pơlê xuan mơdế rĕng séa ngăn ƀă hbrâ troăng hơlâ rak tơniăn tơmeăm khoăng klêi tơmot. Pôa Đỗ Việt Hưng –  Ngế râng Liăn ngân Gia Lai ăm ‘nâi, Tíu pei cheăng kố dế tơrŭm ƀă mâu cheăm tơring vâ séa ngăn tâi tâng tơmeăm khoăng tơnêi têa ƀă riân hdrối liăn ngân tơnêi têa, mơjiâng troăng rơhlâ pro ti lâi vâ tơniăn tơtro.