Kố cho roh lăm pôu pêi cheăng kong têa Belarus apoăng dêi kăn xiâm pơkuâ hnê ngăn Đảng Kŏng san Việt Nam klêi kơ’nâi 11 hơnăm. Lối 30 hơnăm hiăng hluâ, Việt Nam ƀă Belarus hiăng mơjiâng, tơbêng ƀă mơnhông tơrŭm cheăng tơpui kâ tiô khôi vâi krâ nah ƀă tơrŭm lĕm tro tung tơdroăng ki loi tơngah dêi pó, tơdâng tơ’mô ƀă nhuô̆m dêi pó xua pơxúa dêi kuăn pơlê péa tơnêi têa, mơjiâng tơdroăng ki xiâm ăm tơdroăng tơrŭm cheăng krá tơniăn ƀă thăm tơrŭm tâ mê nếo tung rêm kơvâ cheăng.

Roh lăm pôu pêi cheăng dêi Kăn xiâm pơkuâ hnê ngăn Đảng roh kố kô kum mơjiâng ki vâ mơnhông ăm tơrŭm tiô khôi vâi krâ nah ƀă tơrŭm hên pâ Việt Nam – Belarus mơnhông mơdêk păng ‘nâng, mơnhông ki pơxúa dêi tŭm péa pâ vâ djâ ăm pơxúa mâu tơdroăng châ tơƀrê tâ mê nếo tung la ngiâ.