Tung chôu phut tơdrăng, tơrŭm ƀă nhoăm dêi rơpó, péa ngế kăn hiăng tơbleăng tơdroăng cheăng kâ-rêh ối tơrêm tơnêi têa; tối ‘na tơdroăng mơnhông tơrŭm cheăng péa pâ tung la ngiâ, tơpui tơno  vâ môi tuăn ‘na mâu troăng hơlâ tơrŭm cheăng ki kân pơla péa tơnêi têa tung la ngiâ.

Pôa Lương Cường, Kăn xiâm hnê ngăn tơnêi têa ƀă Kăn xiâm pơkuâ kong têa Pơhlăng vâ môi tuăn mơnhông tê mơdró ‘no liăn cheăng; tơbleăng ƀă pêi tơƀrê ai pơxúa tơdroăng tơhrâ tê mơdró tơniăn krê pơla Việt Nam - EU. Pơhlăng kô mơhnhôk Vi ƀan châu Âu rĕng tah “theh trĭng” IUU ƀă tơmeăm ‘na ká xi xŏng Việt Nam ƀă pro hlâu vâ Việt Nam mơdêk tê  ká  xi xŏng ăm kong têa Pơhlăng ƀă EU.

Péa ngế kăn vâ môi tuăn pơtối mơdêk tơrŭm cheăng tung mâu kơvâ cheăng tiah hmâ ing nah mê cho hnê hriâm ƀă hnê mơjiâng tuăn ngôa rơkê, ‘na pơkeăng pơlât ƀă ‘na luât xuân môi tiah tung tơdroăng mơhno túa lĕm tro - ôm hyô, pêi chiâk ƀă hbrâ ví ƀă hyôh kong prâi hơ’lêh. Klêi hôp tơpui tơno, pôa Lương Cường, Kăn xiâm hnê ngăn tơnêi têa ƀă Kăn xiâm pơkuâ kong têa Pơhlăng hlo ƀă mâ leh pơcháu mâu hlá mơ-éa tơrŭm cheăng tung hên tơdroăng cheăng lêng, kring tơniăn, khoa hok kŏng ngê̆, on tơhrik trếo tik nik, ‘na luât, troăng prôk chơ tơmeăm, troăng tơƀai, pêi chiâk ƀă hyôh kong prâi, ‘na pơkeăng pơlât ƀă hên ki ê.