Chôu pâ rơkong Pôa Hồ tối “U lâi kal kô ai droh rơtăm, tơdroăng cheăng pêi ki lâi pá kô ai droh rơtăm” đảng viên Trần Tiến (kot mâ hơnăm 1992) cheăng kơvâ Râk ngăn ‘na Xo Xôh, Theh, Bảo hiêm xah hô̆i kong pơlê Dak Lak hiăng tăng kơ-êng ngăn, tơkŭm pêi mâu tơdroăng cheăng dêi droh rơtăm tung la ngiâ  a mâu mâu pơlê cheăm tung kong pơlê. Ngoh hiăng hên rôh tơdjêp tơkoh ƀă khu tơrŭm pêi cheăng veăng rak vế, tơbleăng mâu tơdroăng kơnía túa lĕm tro dêi kuăn ngo, môi tiah ‘mâi rơnêu, mơgrúa lĕm kơneăng têa, hnê kuăn pơlê hlê tơdroăng rak ăm hyôh kong prâi lĕm đi đo, mơgrúa lĕm tíu ối hyôh kong prâi  ăm kuăn pơlê; hbru tơmeăm, kơjo liăn hnê tŏn chêng koăng ăm kuăn pơlê a kơpong tơkăng kong.

Tơdrêng amê, ngoh Tiến hiăng tăng ‘nâi plĕng, hnê xúa tơdroăng pơ’lêh kơxô̆ tung tơdroăng pêi hnoăng cheăng xiâm tơná, ai hên túa pêi ki nếo, túa hriăn pro ki nếo vâ kơjo kum kuăn pơlê cài đặt, xúa mâu kơmăi ki mơ’no ngăn tơdrêng, pro tơ’lêi hlâu tung tơdroăng pro ngăn pơ’lêh pro ƀă xuá mâu tơdroăng vâ po ngăn ‘na Baoh hiêm xah hô̆i. Đảng viên Trần Tiến tối: 

“A cho đảng viên hơnăm ối nếo, xuân châ chi ƀô̆ pro tơ’lêi hlâu đi đo vâ xo pêi mâu tơdroăng chuyên đề tung tơdroăng rêh ối rêm hâi,  tơ’lêi vâ tăng ‘nâi plĕng trâu rơdâ tâ mâu chuyên đề nhên tơdroăng hriâm ƀă pêi pro tiô Pôa hnê. A đi đo mơ-eăm pêi cheăng tâi ivá tơná xua tơdroăng cheăng tơdjuôm, tung tơdroăng pêi hnoăng cheăng xiâm tơná mê á hriâm ƀôi tiô Pôa hên má môi  tiô tuăn hnê ing tơná hriâm xêh, ôh tá la lâi pơtê hriâm vâ ăm tơná rế rơkê”.

Ƀă nâ Nguyễn Thùy Trang, kot hmâ hơnăm 1992, Kăn hnê ngăn Đoân bêng Ea Tam, pơlê kong kơdrâm Buôn Ma Thuột, mơhé a hơnăm ki lâi, ối nếo lơ hiăng krâ, pro kăn lơ ôh, nâ xuân hlo nhên hnoăng cheăng tơná, hnoăng cheăng dêi kăn ƀô̆, 23 hơnăm hiăng pro Phŏ Kăn hnê ngăn Măt trâ̆n Tơnêi têa bêng hơnăm ôi nếo má môi dêi Dak Lak. Sap ing pơ’lêh cheăng pơkuâ ‘na Đoân, nâ hiăng mơhnhôk mơjiâng 7 tơmeăm khoăng mâu droh rơtăm, tơkŭm po hên tơdroăng rêh ối pơlê pơla, kơhnâ veăng mơhnhôk droh rơtăm pleăng tơná lăm pro mố đô̆i, kum mâu droh rơtăm pơxiâm pêi cheăng, tơdjêp ƀă mâu droh rơtăm pêi mâu tơdroăng rak ƀă pơtối rak túa lĕm tro tơdroăng ton nah mâu hdroâng kuăn ngo. Nâ Nguyễn Thùy Trang ăm ‘nâi:

“Ing mâu tơdroăng mơhnhôk xuân môi tiah tăng ‘nâi plĕng ‘na Pôa mê tơná á hriâm ƀă ing Pôa mâu tuăn tơmiêt pêi ki lĕm, kơhnâ, chiu pá ƀă thế tối hnoăng cheăng dêi tơná tung pêi pro hnoăng cheăng ki châ pơcháu dêi rêm râ. Pêi tơdrăng lĕm, pêi tro tơdroăng ƀă pêi pro tro tiô tơdroăng pơkâ dêi khu tơrŭm cheăng vâ pro xiâm tơrŭm achê má môi pơla Đảng ƀă kuăn pơlê ƀă tung kăn ƀô̆ đoân viên, droh rơtăm”.

Tơmâng xo mơ-eăm, veăng ‘no hnoăng dêi mâu đảng viên hơnăm ối nếo, hdrối kố nah, khu pơkuâ ngăn Đoân Dak Lak hiăng tơkŭm po khĕn kơdeăn 33 ngế đảng viên hơnăm ối nếo lo ing mâu tơring, pơlê kong krâm, pơlê kong kơdrâm ƀă mâu tíu pêi cheăng tung kong pơlê. Kố xuân cho mâu ngế kơhnâ rơkê tung hên tơdroăng, mê cho: ‘na hriâm, tăng ‘nâi plĕng khoa hok, mơnhông cheăng kâ, pơxiâm pêi cheăng tơdroăng cheăng đoân - khu, ‘na lêng - kring tơniăn, mơjiâng thôn pơlê nếo ƀă rak vế hyôh kong  prâi. Châ khĕn kơdeăn klăng rôh kố, nâ Phạm Thị Thu Thảo, Kăn hnê ngăn Đoân dêi hngêi trung phôh thong râ má pái Buôn Hồ, pơlê kong krâm Buôn Hồ, kong pơlê Dak Lak tối:

“A hlo sôk ro ƀă hâk tơngăm, tung chal mơnhông tơná kố, ƀă a cho 1 ngế đảng viên hơnăm ối nếo, môi ngế pơkuâ Đoân mê a hlo hnoăng cheăng tơná cho peăng kŏng ki xiâm vâ veăng gum tơnêi têa rế mơnhông tơƀrê têa”.

“U lâi kal ai droh rơtăm, tơdroăng cheăng pêi ki lâi pá kô ai droh rơtăm” - rơkong hnê dêi Pôa Hồ sap ing nah hiăng chiâng troăng ki mơhno troăng thê pêi pro mơhno ăm hên ngế đảng viên hơnăm ối nêó tung mâu tơdroăng pêi cheăng pleăng tơná. A Dak Lak, mâu đảng viên môi tiah Trần Tiến, Nguyễn Thùy Trang lơ nâ  Phạm Thị Thu Thảo hiăng ƀă dế mơhno hnoăng cheăng tơná ki djâ troăng ahdrối tung tŭm tơdroăng, ing tơdroăng cheăng pêi tơná troh tơdroăng cheăng Đoân, ing tơdroăng rak ngăn túa lĕm tro troh pơ’lêh kơxô̆ ăm kuăn pơlê. Vâi ôh tá xê to hriâm ing Pôa ‘na tuăn mơ-eăm ‘nâi hriâm xêh ƀă ai tuăn lĕm tro, mê ối pro mâu tơdroăng ki ai pơxúa mê chiâng tơdroăng pêi ki nhên, ai pơxúa khât, tơbleăng troh tơdroăng rêh ối lĕm - rêh ối ai pơxúa tung kuăn pơlê.  

Tơdroăng khĕn kơdeăn đảng viên hơnăm ối nếo kơhnâ rơkê cho rôh vâ Khu pơkuâ ngăn Đoân Droh rơtăm Dak Lak pơtối tơbâ tơdroăng pleăng hnoăng tơná, ai tuăn mơ-eăm vâ rế tơƀrê tung đoân viên, droh rơtăm; veăng ‘no hnoăng mơjiâng khu tơrŭm cheăng Đoân Droh rơtăm rơdêi, pơtối rak vế hnoăng cheăng pêi dêi hơnăm ối nếo tung tơdroăng mơjiâng ƀă kring vế Tơnêi têa. Mơjiâng Dak Lak rế ton rế xông tơƀrê, rơkê plĕng, pêi cheăng rơkê tiô túa nếo nôkố.