Drêng veăng hôp a rôh hôp khu râ kăn xiâm ASEAN má 46, kơxê lơ 26/5, pôa Phạm Minh Chính, Ngế pro xiâm hnê ngăn Chin phuh hiăng ai rôh trâm pôa Xỏn-xay Xi-phăn-đon, Ngế pro xiâm hnê ngăn kong têa Lếo. Péa ngế pro xiâm hnê ngăn tơnêi têa hiăng môi tuăn mơdêk tơbleăng 2 tơdroăng tơkêa pro troăng prôk ki kal cho troăng kân tơdrăng Hà Nội – Viêng Chăn, troăng rơxế lơ treng Viêng Chăn – Vũng Áng.

A rôh trâm, pôa Xỏn-xay Xi-phăn-đon, Ngế pro xiâm hnê ngăn kong têa Lếo mơnê tơdroăng tŏng gum hiâm mơno tơrŭm ƀă tơdroăng tŏng gum lĕm tro krúa tơniăn dêi Việt Nam ăm Lếo tung hnoăng cheăng tơplâ tơleăng hdroâng mơngế hdrối nah xuân môi tiah mơnhông tơnêi têa hâi kố; tối nhên, Chin phuh Lếo kô tơrŭm krá tơniăn ƀă Chin phuh Việt Nam tơbleăng tơƀrê, tro tơdroăng pêi pro mâu tơkêa tơrŭm cheăng ki kal pơla péa tơnêi têa, ai pơxúa tơbâ mâu hâi leh ki kal dêi péa Đảng, péa Tơnêi têa tung hơnăm 2025.

Péa Ngế pro xiâm hnê ngăn tơnêi têa môi tuăn tơrŭm krá tơniăn tơbleăng tơƀrê mâu tơkêa khu râ kăn xiâm péa tơnêi têa; tơrŭm krá tơniăn rak vế gâk kring, tơniăn tung lâp pơlê pơla; thăm mơnhông tơrŭm gâk kring, cheăng lêng; thăm mơdêk tơdjêp péa kong têa ‘na troăng prôk, on tơhrik, viễn thông ƀă ôm hyô, tung mê, pơtối mơdêk tơbleăng pro 2 tơdroăng tơkêa troăng prôk ki kal cho troăng kân Hà Nội – Viêng Chăn, troăng rơxế lơ treng Viêng Chăn – Vũng Áng.