Klêi kơ’nâi tơdroăng tơkêa bro tơmot chiâng môi péa kong pơlê Dak Lak ƀă Phú Yên, hrĭng ngế kăn ƀô̆, kŏng chưk ing Phú Yên kô lăm troh a pơlê kong kơdrâm Ƀuôn Ma Thuột (Dak Lak) tơdah hnoăng cheăng. Mâu troăng tŏng gum ‘na hngêi ối, rơxế dế châ tơmiât pêi pro. Ki nhên, klêi tơmot chiâng môi kô ai dâng 1.000 kăn ƀô̆, viên chưk ing Phú Yên troh a pơlê kong kơdrâm Ƀuôn Ma Thuột, kong pơlê Dak Lak vâ tơdah hnoăng cheăng.

Pôa Trương Ngọc Tuấn – Kăn pơkuâ Khu pơkuâ kăn ƀô̆ kong pơlê Phú Yên – tối ăm ‘nâi, kơvâ cheăng dế mơjiâng troăng pêi tŏng gum ‘na hngêi ối, rơxế kơto prôk lăm vâ kum kăn ƀô̆, kŏng chưk, mơngế pêi cheăng hmiân tuăn pêi cheăng. Nôkố mâu troăng tŏng gum dế châ tơmiât nhên vâ tơniăn châ tơƀrê.