Tung mâu hâi ki kố, kŏng nhân a tíu mơjiâng pro troăng kân vâ prôk  troh a mâu tơring Mang Yang - Ia Pa, pêi cheăng môi tiah thâ tơbréa la troăng kăn ki pro mê xŏn 33 km , kơxô̆ liăn vâ mơjiâng pro kơnâ lối 195 rơtal liăn, nhôm mơni kô ối hrá klêi. Pơxiâm mơjiâng pro sap ing khế 11 /2023 nah ƀă tối kô pro klêi a 1/2026, la hên tíu ki ‘nâ pro hâi teăm klêi xua ối pá ‘na tơdroăng chêl thiăn liăn ‘mâi xĕn tơnêi tíu ki vâ pro, pro hên khu mơjiâng pro ôh tá chiâng vâ tơbleăng thế pro.

Pôa Krung Dam Đoàn, Phŏ Kăn hnê ngăn Vi ƀan kuăn pơlê tơring ‘Mang Yang ăm ‘nâi, hên tíu ki kal chêl thiăn liăn ‘mâi xĕn tơnêi chiâk deăng tro nhên tiô yă tơnêi

“Tơdroăng chêl thiăn liăn ‘mâi xĕn tơnêi kơdrum hngêi chiâk deăng ki tơdjâk bê troh 33 rơpŏng kuăn pơlê, luâ  3 to cheăm: Kon Thụp, Đăk Djrăng ƀă Lơ Pang (tơring Mang Yang). Nôkố ối mâu tíu ki ‘nâ kal thế ai yă tơnêi inhên mê Vi ƀan kuăn pơlê tơring hiăng tơrŭm ƀă tíu pêi cheăng ki pơkuâ ‘no liăn mơjiâng pro vâ rĕng pro klêi hlá mơ-éa, rĕng ‘nâi nhên yă vâ pơkâ yă tơbleăng ăm kuăn pơlê, tơniăn tro tiô pơkâ dêi Luât”.

Peăng pơkuâ mơjiâng pro, pôa Nguyễn Hữu Sơn, pơkuâ Ƀơrô Rak ngăn tơdroăng tơkêa bro 01 (Khu Rak ngăn mâu tơdroăng tơkêa bro ‘no liăn mơjiâng kong pơlê Gia Lai ăm ‘nâi, troh nôkố, tơdroăng pêi pro a kơxô̆ liăn pro nếo vâ chê 61% tơdroăng pơkâ. Tíu pêi pro kô mơ-eăm tah ki xơpá tơvâ tơvân ƀă mơ-eăm pro klêi tơmeăm khoăng hdrối hâi lơ 30/8.

“Tơdroăng cheăng tơrŭm khu kăn kô đi đo rah mơngế lăm pêi cheăng ƀă Hô̆i đong chêl thiăn liăn ‘mâi xĕn tơnêi kơdrum deăng ƀă Vi ƀan kuăn pơlê dêi tơring ‘Mang Yang vâ tung pơla pêi pro tâng ai tơvâ tơvân kô teăm vâ tơleăng mơnhên. Khu kăn xuân mơ-eăm ƀă hnê mơhno mâu khu mơjiâng pro tơkŭm kơmăi kơmok, mơngế pêi, tơmeăm vâ pêi vâ rĕng pro klêi teăm tiô tơdroăng pơkâ”.

Tơdroăng tơkêa bro Khu kuăn pơlê a troăng Nguyễn Văn Linh (pơlê kong kơdrâm Pleiku) xuân dế pro hrá xua hâi klêi chêl thiăn ‘mâi xĕn tơnêi chiâk kơdrum deăng. Tơdroăng tơkêa bro ai tâi tâng kơxô̆ liăn ‘no 260 rơtal liăn, xúa kơxô̆ liăn ngân tơnêi têa ƀă tiô tối hdrối kô pêi klêi sap hơnăm 2022- 2025.

Laga, tơdroăng ki khât troh nôkố bú ai vâ chê 60%. Tung tâi tâng tơnêi vâ chê 40 ha kal tơvêh, bú dâng 24 ha châ môi tuăn troăng hơkâ chêl thiăn.

Ing mâu tơdroăng ki ai khât kố, Vi ƀan kuăn pơlê kong pơlê Gia Lai hiăng pơkâ hlá mơ-éa hnê mơhno mâu tíu pêi cheăng ai tơdjâk troh séa ngăn, tah xơpá ƀă mơdêk rĕng mơjiâng pro tơmeăm khoăng. Pôa Nguyễn Hữu Quế, Phŏ kăn hnê ngăn Vi ƀan kuăn pơlê kong pơlê Gia Lai rơtế ƀă mâu khu râ kơvâ cheăng hiăng rĕng séa ngăn tơnêi tíu ƀă teăm ai mâu tơdroăng hnê mơhno vâ tah ki xơpá a mâu tíu mơjiâng pro; mơhnhôk rĕng pro a mâu kơpong hiăng ai tíu pro, tơniăn tơdroăng pro ƀă hbrâ pơtối pêi mâu tơdroăng tơkêa pro a rôh ki nếo.

“Hnoăng cheăng ‘na tơdroăng cheăng hnê chêl thiăn ‘na xĕn tơnêi tíu kơdrum deăng cho dêi rêm râ kăn. Lăm trâm mâ tơrêm ngế môi troăng hơlâ, ai mâu ngế ki ‘nâ thế pro kơtăng, drêng pêi tâng hlo tơvâ tơvân thế tơnleăng ăm Vi ƀan kuăn pơlê kong pơlê pâ kơ êng hdrối ƀă mơhno ki tơmâng khât dêi tơná, pro tiah mê cho ai pơxúa ăm tơnêi têa, pro pơxúa ăm kuăn pơlê mê pâ thế Vi ƀan kuăn pơlê kong pơlê séa ngăn pơkâ. Kal mơhno hnoăng cheăng, hdró hâi khế môi tiah hiăng mơnhên ki mơ-eăm pro ti lâi vâ tơ’lêi tơbleăng pêi mâu mâu tơdroăng ki pơtối nếo’’.

Tơdroăng Vi ƀan Kuăn pơlê kong pơlê Gia Lai thâ tơbleăng pêi mâu tơdroăng vâ tơniăn tơdroăng rak ngăn tơbrê mâu tơdroăng, tơkêa ‘no liăn pro tơmeăm khoăng tơnêi têa thế pêi tơdrêng tung tơdroăng xing xoăng pro rế lĕm, khu ki pêi cheăng ăm tơnêi têa a kong pơlê. Mâu ngế châ Vi ƀan Kuăn pơlê kong pơlê Gia Lai pơkâ thế tơkŭm séa ngăn cho mâu tơdroăng tơkêa ‘no liăn mơjiâng pro tơmeăm khoăng tơnêi têa cho tung tơdroăng pơkâ pêi ton hơnăm sap hơnăm 2021-2025, pơkâ hơnăm 2025 xuân môi tiah mâu tơdroăng tơkêa bro ki pơtó.

Pakĭng mê, Vi ƀan kuăn pơlê kong pơlê pơkâ thế mâu tíu pêi cheăng ki tơdjâk troh tơkŭm tơleăng mơnhên mâu tơdroăng tơkêa bro hâi pêi kơtăng, mâu tơdroăng tơkêa pro ai kơxô̆ liăn mung hâi châ tơvêh ƀă mâu tơdroăng tơkêa bro hiăng kĭ pơkâ la hâi xoăng tŭm kơxô̆ liăn ăm.

Vâ mơhnhôk rĕng pro ƀă tơniăn pêi đi đo tung rak ngăn, Vi ƀan kuăn pơlê kong pơlê Gia Lai hiăng hnê mơhno mâu tíu pêi cheăng, kơvâ cheăng ƀă Vi ƀan mâu tơring, pơlê kong krâm, kong kơdrâm thế xoăng nhên hnoăng cheăng pêi, tơleăng mơnhên mâu tơdroăng tơvâ tơvân ki nếo trâm. Malối, ƀă mâu tơmeăm khoăng mơjiâng ƀă tíu pêi cheăng ki tro tơdjâk xua xing xoăng pro rế lĕm mơngế ki pêi cheăng ăm tơnêi têa, mâu tíu pêi cheăng kal tí tăng ngăn nếo, pơkâ thế pơ’lêh ăm tơtro vâ tơniăn tơƀrê tung pêi cheăng, ‘nâi kơdĭng liăn, pôi tá mơ’nhiê liăn tê kơtê, pôi la lôi mơngế pêi ki cheăng rơkê.