Tung toăng hngêi kân lĕm rơdâ nếo châ mơjiâng diâp ăm, rơpŏng pôa Rơ Lan Đếu ối a pơlê Bó, cheăm Ia Kly, tơring Chư Prông hâk ro tơdah vâi krâ nhŏng o achê hơngế troh lăm pôu, rơkâu. Rơkong tơpui tó kơdrâm lâp hngêi nếo, troh lâp lu tơdroăng phiu ro tơkŭm ƀă tơdroăng ki hơtôu lĕm. Sap ing kố, rơpŏng pôa hiăng ai tíu ối tơniăn lĕm drêng ai hngêi ối ƀă tíu hơpiâp on hơtô lĕm, hngêi mơdrah, plông hngêi phuâng lĕm ƀă bo hngêi krá tơniăn.

Toăng hngêi dêi pôa Đếu cho môi tung lối 1.000 toăng hngêi ối tung tơdroăng têa tah hngêi pơtân, hngêi xiê kơchoh dế châ pêi pro tung tơring Chư Prông tung hơnăm 2025. Pôa Rơ Lan Đếu rơrêk tung hiâm mơno tối ăm ‘nâi, toăng hngêi nếo cho tơdroăng ki veăng tơlo dêi hên ngế, ing nhŏng o, pú hmâ troh Măt trâ̆n Tơnêi têa, mâu râ kal kí – rêh ối pơlê pơla ƀă khu mô đô̆i tung kong pơlê:

‘’Á phiu ro ‘nâng. Pâ mơnê mâu râ hiăng tŏng gum liăn, hâi pêi cheăng ăm rơpŏng á môi toăng hngêi meăn mơjiâng kân rơdâ. Nôkố ai hngêi, rơpŏng kô mơ-eăm pêi kâ vâ mơ-eăm xông tơtêk’’.

A tơring Chư Prông – tơring ai kơxô̆ hngêi xi kơchoh kal têa tah hên má môi kong pơlê Gia Lai, troăng mơhnhôk hâi pêi cheăng ing rơpŏng hngêi tơdjêp ƀă tơdroăng tơdjuôm ivá dêi mâu khu cheăng kal kí – rêh ối pơlê pơla hiăng kum pro ƀai toăn mơngế pêi cheăng ƀă pêi pro rĕng tơdroăng mơjiâng. Kố xuân cho troăng pêi châ tơring rơtế pêi pro vâ pro rĕng pêi pro tơdroăng xiâm, kum kuăn pơlê rĕng ai hngêi nếo kân rơdâ, krá tơniăn. Xuân troăng pêi môi tiah mê, tơring Phú Thiện hiăng hbrâ pêi pro hên hĭn tơdroăng.

Tơring rôe tơmeăm tơdjuôm ƀă rôe hên vâ kơdroh yă, kơ’nâi mê xing xoăng a mâu cheăm. Tơdroăng mơjiâng pro châ tơkŭm po tơtro, mơhnhôk tôh khu ki chiâng pêi rơkê pêi ki xiâm, kuăn pơlê veăng kum pêi tơdroăng ki hlâu.

Kơnôm tiah mê, troh nôkố, tơring hiăng pêi kêi đeăng pơkâ, châ plah hdrối hâi khế ki Khu hnê mơhno kong pơlê pơcháu; tơniăn Kuăn pơlê ai hngêi krá tơniăn mê xuân tiô khôi túa vâi krâ nah. Jâ Nay HDoănh, cheăm Ia Piar, tơring Phú Thiện tối tơdroăng ki phiu ro drêng lăm ối a hngêi nếo.

‘’Rơpŏng á mơnê kơ Đảng, Tơnêi têa ƀă mâu râ hên ‘nâng. Nôkố ai hngêi nếo, hmiân tuăn pêi kâ, rak ngăn kuăn ‘nĕng’’.

Hơnăm 2025, mơhnhôk tơdroăng hnê mơhno kơtăng dêi Ngế pro xiâm hnê ngăn Chin phuh, Gia Lai châ pơkâ têa tah 8.485 toăng hngêi pơtân, xi kơchoh. Klêi tơdroăng nếo pêi pro, Khu hnê mơhno ƀă Tôh kum tơdroăng cheăng châ mơjiâng, hnê mơhno troh rêm khu, kơvâ cheăng, kong pơlê. Kơnôm mê, tơdroăng pêi mơhnhôk tơdroăng ki veăng dêi khu râ kăn pơkuâ hnê ngăn Đảng, khu râ kăn pơkuâ, rêm râ, khu lêng. Ki má lối cho Kŏng an kong pơlê hiăng veăng tơlo liăn, hâi pêi cheăng, tơrŭm ƀă khu râ kăn pơkuâ, Măt trâ̆n Tơnêi têa, rêm râ ƀă Kuăn pơlê pêi pro rĕng tơdroăng mơjiâng pro. Thiê̆u tươ̆ng Rah Lan Lâm – Kăn pơkuâ Kŏng an kong pơlê, Kăn Khu hnê mơhno tơdroăng têa tah hngêi pơtân, hngêi xi kơchoh Kŏng an kong pơlê Gia Lai tối ăm ‘nâi:

‘’Đảng ủy Kŏng an kong pơlê hiăng pêi pro châ tơƀrê. Kăn ƀô̆, mâu lêng hiăng veăng tơlo 1 hâi liăn khế, veăng tơlo lối 3 rơtal liăn. Tơdrêng amê veăng tơlo hâi pêi cheăng, tơrŭm krá tơniăn ƀă mâu kơvâ cheăng, kong pơlê, pêi pro hên tơdroăng, lôi ăm hên tơdroăng ki lĕm tung hiâm mơno kuăn pơlê’’.

Ƀă ivá ó rơdêi rơtế hên troăng tơmiât pêi rơkê, troh nôkố kong pơlê hiăng châ lối 82% pơkâ pêi mơjiâng pro ƀă 42% pơkâ pêi pơcháu. 7/17 tơring hiăng kêi đeăng pơkâ pêi, mê cho: Pơlê kong kơdrâm Pleiku, Pơlê kong krâm An Khê, pơlê kong krâm Ayun Pa, mâu tơring Đăk Pơ, Đức Cơ, Krông Pa ƀă Phú Thiện. Mâu tơring ki ê xuân dế thăm pêi rĕng vâ châ plah tơdroăng xiâm. Pôa Đinh Văn Dũng, Kăn pơkuâ hnê ngăn cheăng Đảng tơring Chư Prông mơnhên tơdroăng ki khŏm mơ-eăm dêi tơring xuân cho tơdroăng khŏm mơ-eăm dêi kong pơlê, kêi đeăng tơdroăng hdrối rơnó mêi hơnăm kố:

‘’Tâi tâng mâu toăng hngêi pơrá mơjiâng tro pơkâ, ƀăng deăng sap ing 36 met karê tơngi klêng. Hên rơpŏng tơ’nôm dêi liăn pro hngêi 60 – 70 met karê, ai tŭm kơnâng, bo cheăng hngêi, plông hngêi, tơmeăm ki tơ’nôm. Troh lơ 30/6, ngin kô pêi kêi đeăng tâi tâng 997 toăng hngêi mơjiâng nếo, tơniăn 100% ngế ki châ gum ai hngêi ối krá lĕm, ki rơhêng vâ tối cho rơpŏng kơtiê, vâ chê kơtiê, mơdêk tơdroăng rêh ối kuăn pơlê’’.

Tơdroăng ki khŏm mơ-eăm, tơmiât pêi rơkê tung pêi pro tơdroăng têa tah hngêi pơtân, hngêi xi kơchoh a Gia Lai hiăng djâ châ tơƀrê păng ‘nâng. Môi roh pơhlêh kân ‘na hngêi ối ăm rơpŏng kơtiê hiăng vâ kêi đeăng, kum ngiâ méa thôn pơlê, ki má lối cho kơpong hdroâng kuăn ngo kong pơlê Gia Lai thăm rế kân rơdâ ƀă phuâng lĕm, pơhlêh nếo.