Xông tơpui a hneăng hôp, pôa Tô Lâm, Kăn xiâm pơkuâ hnê ngăn Đảng tối nhên, khu Kŏng an kuăn pơlê thế đi đo mơdêk hriâm tâp, pêi tiô troăng tơdjâ, hiâm mơno, troăng pêi Pôa Hồ Chí Minh, pêi pro châ tơƀrê Tơdrốu troăng Pôa Hồ hnê Kŏng an kuăn pơlê. Pôa Tô Lâm, Kăn xiâm pơkuâ hnê ngăn Đảng tối nhên, vâ tơdroăng hriâm tâp, pêi tiô Pôa Hồ châ tơƀrê, tâi tâng khu Kŏng an kuăn pơlê, rêm khu râ kăn pơkuâ hnê ngăn cheăng Đảng, khu râ kăn pơkuâ, kăn ƀô̆, mâu lêng hiăng mơ-eăm, kal pơtối mơ-eăm, mơ-eăm hên tâ mê nếo.

Pơhlêh nếo ó rơdêi troăng tơmiât, troăng pêi, troăng pêi cheăng, pêi kêi đeăng rơkê rêm hnoăng cheăng châ pơcháu, rơtế tâi tâng Đảng, tâi tâng kuăn pơlê, tâi tâng khu lêng ‘’mơjiâng môi tơnêi têa Việt Nam hơniâp lĕm, tơrŭm chiâng môi, tơniăn krê, kuăn pơlê pơkuâ dêi hnoăng cheăng ƀă kro mơdrŏng, veăng kum tơxâng tung tơdroăng cheăng kăch măng lâp plâi tơnêi’’ môi tiah pói vâ dêi Pôa Hồ Chí Minh, Kăn xiâm hnê ngăn tơnêi têa hneăng apoăng ƀă tơdroăng pói vâ dêi tâi tâng hdroâng mơngế.