Kơxo lơ 13/8, pôa Tô Lâm, kăn xiâm pơkuâ hnê ngăn cheăng Đảng prế Kơdrâi pôa rơtế ƀă Khu kăn xiâm Việt Nam hiăng lo ing pơlê kong xiâm Seoul troh pơlê kong kân Busan, pơtối mâu tơdroăng cheăng tung rôh lăm pôu râ tơnêi têa troh Hàn Quốc.

Klêi kơ’nâi troh pơlê kong kân Busan, pôa Tô Lâm, kăn xiâm pơkuâ hnê ngăn cheăng Đảng hiăng tơdah kăn teăng mâ Việt Nam Park Soo Kwan a Hàn Quốc. A rôh tơdah, pôa Tô Lâm, kăn xiâm pơkuâ hnê ngăn cheăng Đảng ăm ‘nâi, ƀă tơdroăng ki pơkâ pêi thăm mơnhông ai mâ tơpui kâ Việt Nam a kơpong peăng Hdroh Hàn Quốc, tơdrêng amê hlối pêi pro châ tơdroăng púi vâ rế hía rế hên dêi kuăn pơlê Việt Nam ƀă mâu ngế ki tơrŭm cheăng akố, Khu xiâm tơpui kâ Việt Nam hiăng pơkâ mơjiâng Kăn teăng mâ Việt Nam a pơlê kong kân Busan.

Vâ cheăng dêi Kăn teăng mâ Việt Nam a pơlê kong kân Busan châ tơbleăng pêi tơƀrê tơ’lêi ƀă mot trâu hngế xêt tơƀrê, Kăn xiâm pơkuâ hnê ngăn cheăng Đảng rơhêng vâ pôa Park Soo Kwan pơtối tơmâng ngăn, tŏng gum ƀă pro tơ’lêi hlâu má môi ăm kăn teăng mâ Việt Nam a pơlê kong kân Busan, Hàn Quốc tung la ngiâ.