Tiô rơkong krếo thế dêi pôa Lee Jae Myung, Kăn xiâm pơkuâ kong têa Hàn Quốc, pôa Tô Lâm, kăn xiâm pơkuâ hnê ngăn cheăng Đảng prế kơdrâi pôa rơtế ƀă mâu kăn xiâm tơnêi têa pin lăm pôu râ Tơnêi têa troh kong têa Hàn Quốc ing hâi lơ 10 – 13/8, kơxo lơ 11/8 tiô chôu tơnêi têa a Tíu pêi cheăng kăn xiâm pơkuâ kong têa, pôa Lee Jae Myung, kăn xiâm pơkuâ kong têa pơkuâ po leh tơdah kân krip pôa Tô Lâm, kăn xiâm pơkuâ hnê ngăn cheăng Đảng tiô tơdroăng ki krip má môi.

Klêi kơ’nâi leh tơdah păng ‘nâng 2 ngế kăn pơkuâ hiăng pơkuâ djâ khu kăn xiâm péa tơnêi têa po hôp tơpui tơno vâ mơ’no mâu troăng hơlâ ki kal vâ pơtối rak vế ƀă mơnhông tâ nếo tơrŭm cheăng Kong têa tơrŭm tung la ngiâ tŭm têk Việt Nam ƀă Hàn Quốc tung la ngiâ. Tơpui a rôh trâm, pôa Tô Lâm, Kăn xiâm pơkuâ hnê ngăn cheăng Đảng tối rơdêi: Phiu ro khât ƀă mơnê kăn xiâm pơkuâ kong têa hiăng mơdoh chôu krếo thế kăn xiâm pơkuâ hnê ngăn cheăng Đảng cho tơmối ki apoăng klêi kơ’nâi Hàn Quốc ai kăn pơkuâ nếo, mơhno tơdroăng ki ngăn nhuô̆m ƀă kơjo gum má môi dêi hàn Quốc ƀă krê dêi kăn xiâm pơkuâ hnê ngăn cheăng Đảng ƀă tơrŭm cheăng pơla 2 tơnêi têa.

Pôa Lee Jae Myung, kăn xiâm pơkuâ kong têa Hàn Quốc tối rơdêi, xua tơdroăng pơkuâ rơkê plĕng dêi pôa Tô Lâm, Kăn xiâm pơkuâ hnê ngăn cheăng Đảng, Việt Nam nôkố dế hlo mơnhông cheăng kâ rĕng khât, kăn xiâm pơkuâ kong têa Hàn Quốc loi tiah kố tung la ngiâ ah Việt Nam kô chiâng tơnêi têa mơnhông ƀă pêi lo liăn hên.