Pêi pro tơdroăng cheăng vâ troh tơbâ 80 hơnăm Kăch măng Khế tơheăm châ ƀlêi trâng lơ (19/8) ƀă hâi mơjiâng tơnêi têa lơ 2/9, hâi lơ 31/7 a Hà Nội  Pôa Tô Lâm Kăn xiâm pơkuâ hnê ngăn Đảng, Kăn hnê ngăn Khu đảng lêng Xiâm troh veăng hôp ƀă pơkuâ trâm mâ mâu kăn ƀô̆ hơnăm hiăng krâ kăch măng, xiâm xông pơplâ, jâ nôu Việt Nam khên tơnôu, Kăn lêng, Khu lêng tơplâ khên tơnôu dêi kuăn pơlê tung Mâu lêng kuăn pơlê Việt Nam. 

Tơpui tơno ƀă mâu ngế trâm mâ, pôa Tô lâm kăn xiâm pơkuâ hnê ngăn Đảng  tối, troh nôkố mơhé dế tơniăn lĕn, mâu kăn mê hiăng pơtê cheăng, la xuân ối pơtối rak vế pêi pro túa cheăng ki lĕm khên tơnôu dêi “ Mố đô̆i Pôa Hồ”, xuân ai tuăn vâ tơplâ ƀlêi trâng’’ cho tíu ki tơngah krá kak ăm mâu rơxông kuăn cháu.

Pôa Tô lâm kăn xiâm pơkuâ hnê ngăn Đảng  loi khât, ƀă tuăn mơ-eăm, pêi tro hnoăng cheăng, khên tơnôu, tuăn rơkê ƀă ngăn tiô kơ tơdroăng dêi tơrêm ngế, mâu kăn kô pơtối   veăng ‘no hnoăng tơná ăm tơdroăng mơjiâng kăch măng ki lĕm dêi Đảng, dêi kuăn pơlê ƀă hdroâng mơngế; rơtế ƀă dêi rơpó ‘no ivá mơnhông tơrŭm môi tuăn tâi tâng kuăn pơlê mơnhông dêi tơnêi têa rế xông rơdêi, hơniâp lĕm, tơdrêng ƀă mâu kong têa tung lâp plâi tơnêi môi tiah pôa Hồ hiăng púi vâ.