Tơbâ 80 hơnăm Hâi Kăch măng khế Tơheăm ƀlêi trâng ƀă Tơnêi têa lơ 2/9; 80 hơnăm Hâi mơjiâng khu lêng kŏng an Kuăn pơlê Việt Nam ƀă 20 hơnăm Hâi Tâi tâng kuăn pơlê kring vế tơnêi têa, kơxo hâi lơ 14/8 a cheăm Tân Trào, Tuyên Quang Tơkŭm po Hâi leh tâi tâng kuăn pơlê kring vế Tơnêi têa hơnăm 2025 ƀă leh hiăng pro kêi Tíu meăn um “Pôa Hồ a Tân Trào”. Tơbleăng a hâi leh, pôa Tô Lâm tối nhên, hâi leh cho rôh vâ tơbâ tơdroăng ton nah, chôu pâ, tơbâ vế hnoăng ƀă mơhno hnoăng cheăng ki kal, tung tơdroăng veăng ‘no hnoăng kân dêi kuăn pơlê tung tơdroăng rêh ối kring vế tơniăn tơnêi têa, tơniăn pơlê pơla, pơtối rak vế ki rơdêi tiô hmâ kơnía ton nah tung mê ai chal nếo, chal ki kro mơdrŏng, tơrŭm ƀă mơnhông ƀă tơƀrê.

Vâ pơtối rak vế ivá rơdêi dế kuăn pơlê, hnoăng cheăng xiâm dêi mâu lêng kŏng an kring tơniăn, Kăn xiâm pơkuâ ngăn Đảng  pơkâ kong pơlê Tuyên Quang, cheăm Tân Trào pơtối hnê pêi kơtăng mâu troăng hơlâ dêi Đảng, Tơnêi têa ‘na mơjiâng tơdroăng mơhnhôk tâi tâng kuăn pơlê kring vế tơniăn Tơnêi têa; hlê tơdroăng xo kuăn pơlê pro xiâm, kuăn pơlê cho ki xiâm ƀă ngế xiâm dêi tơdroăng kring vế tơniăn tơnêi têa, kăch măng cho tơdroăng cheăng dêi kuăn pơlê, ing kuăn pơlê, xúa kuăn pơlê.