Kơxê hâi lơ 16/5, a Tíu pêi cheăng xiâm Đảng, pôa Tô Lâm, Kăn xiâm pơkuâ hnê ngăn Đảng hiăng tơdah jâ Paetongtarn Shinawatra, Ngế pro xiâm hnê ngăn kong têa Siam, Kăn xiâm pơkuâ ngăn Đảng Xua tơnêi têa Siam dế lăm pôu pêi cheăng a tơnêi têa Việt Nam ƀă hnối rơtế pơkuâ xiâm Hneăng hôp roh má 4, hôp Chin phuh pơchuâm pơla Việt Nam ƀă Siam.

A chôu phut tơdah mê, pôa Tô Lâm vêh mơnhên, Việt Nam đi đo ngăn nhoăm ƀă pói rơhêng vâ thăm mơdêk rế a’ngêi tâ nếo kong têa nhŏng o achê ƀă tơrŭm hên kơvâ cheăng ƀă Siam-kong têa ki achê, ai tơdroăng tơrŭm ki hiăng ton hơnăm, tơdrêng amê, cho kong têa ki hmâ tơrŭm tê mơdró kâ ƀă mơ’no liăn ki kal kân má môi dêi Việt Nam.

Pôa Tô Lâm tối nhên mâu hnoăng cheăng ki xiâm tung tơrŭm cheăng pơla Việt Nam ƀă  Siam tung la ngiâ: Pơkâ thế péa pâ pơtối ‘mâi mơnhông tuăn i hiâm loi tơngah cheăng kal kí, kơnôm ing tơdroăng thăm mơdêk trâm mâ, tơpui tơno, tơrŭm tung tâi tâng mâu kơvâ cheăng dêi Đảng, Tơnêi têa ƀă tơdroăng ki ăm kuăn pơlê châ trâm mâ, tơpui tơno dêi pó, đi đo po mâu roh trâm mâ khu râ, kơvâ cheăng, trâm mâ pơla mâu kăn xiâm ƀă khu râ cheăng; pơtối mơdêk tơdroăng ki dâi khât, châ pơxúa tiô túa ki hôp pơla Chin phuh pơchuâm ƀă mâu túa cheăng tơrŭm pơla péa pâ dế ai nôkố pơla péa pâ kong têa, klêi mê, hriăn plĕng vâ mơdêk a’ngêi tâ nếo mâu túa cheăng ki tơrŭm a râ ki rơkê tro tâ nếo ƀă po mơjiâng mâu túa cheăng tơrŭm ki nếo.