Pêi pro hnê mơhno dêi Ngế pro xiâm hnê ngăn Chin phuh, hâi lơ 7/4, a kong pơlê Tiền Giang, pôa Trần Hồng Hà, Ngế pro xiâm phŏ hnê ngăn Chin phuh rơtế ƀă pôa Lê Minh Hoan – Ngế xiâm pơkuâ ‘na pêi chiâk deăng ƀă mơnhông thôn pơlê, ƀă pôa Đặng Quốc Khánh – Ngế xiâm pơkuâ kế tơmeăm khoăng ƀă kong prâi pơkuâ roh hôp mơ’no tơdrêng tung um tiô troăng măng ƀă mâu kong pơlê kơpong tơbăng kroăng Cửu Long, mê cho: Tiền Giang, Bến Tre, Sóc Trăng, Cà Mau, Kiên Giang, Bạc Liêu, Long An ‘na tơdroăng pêi cheăng kố.

Rơnó tô hơnăm kố, xua kơdró têa kroăng Mekong kơdroh 7% tâng pơchông ƀă mâu hơnăm hdrối xua mê kơpong tơbăng kroăng Cửu Long tro tơdjâk dêi têa xăng po lân mot rĕng, trâu tâ tiah hmâ hên hơnăm, kong mêi hrá; ki rơhêng vâ tối ai 3 roh têa xăng po lân mot râ ó ai troh apoăng khế 5. Xông tơpui a roh pêi cheăng ƀă khu râ kăn pêi cheăng dêi Chin phuh, khu râ kăn pơkuâ mâu kong pơlê pâ thế mâu Khu xiâm, kơvâ cheăng Tơnêi têa ƀă têa kroăng, mâu tơmeăm hdoăng chuâ ăm têa krúa tơkŭm a kơpong, hbrâ ví tơdroăng tơhnah, tơhnâp tơnêi...

Xông tơpui mơgêi roh pêi cheăng, pôa Trần Hồng Hà, Ngế pro xiâm phŏ hnê ngăn tơnêi têa pơchân tối mâu kong pơlê kơpong tơbăng kroăng Cửu Long kal xo vế túa ki rơkê tơtro tung pêi cheăng hbrâ ví têa xăng po lân mot, vêh mơnhên kơnhŏng têa mŏng, ai troăng hbrâ rêh ối tơdjuôm drêng ai têa xăng po lân mot tiô rêm kong pơlê, krá tơniăn mâu rơchôa hno têa.