A tíu pêi cheăng Khu xiâm tơpui kâ, pôa Trần Lưu Quang, Ngế xiâm phŏ hnê ngăn Chin phuh hiăng ai rôh pêi cheăng ƀă Khu xiâm tơpui kâ ‘na hnoăng cheăng tơpui kâ tung hơnăm 2023. Tối tơbleăng hnê mơhno a rôh pêi cheăng, pôa Trần Lưu Quang, Ngế pro xiâm phŏ hnê ngăn Chin phuh pơtroh rơkong rơkâu hơnăm nếo lĕm tro ăm khu kăn hnê ngăn, kăn ƀô̆, mâu kăn mâu ngế cheăng dêi khu xiâm tơpui kâ; tối kơvâ cheăng tơpui kâ ai tơdroăng hmâ pêi pro ki lĕm tro, cho ki xiâm tơdroăng kal tung hnoăng mơjiâng ƀă kring vế Tơnêi têa.

Ngế pro xiâm phŏ hnê ngăn tơnêi têa tối nhên, Ngế xiâm tơpui kâ kal pơtối rak vế tơdroăng tơpui kâ ki lĕm ƀă mâu tơdroăng hiăng châ pêi pro, tro tiô troăng rơhlâ tơpui kâ Hneăng hôp má 13 dêi Đảng ƀă hnê mơhno dêi pôa Nguyễn Phú Trọng, Kăn xiâm pơkuâ hnê ngăn Đảng a hneăng hôp tơpui tơno lâp tơnêi têa hơnăm 2021, pơtối pêi rơdêi hnoăng cheăng ki ahdrối  tung tơbleăng tơdrêng, pêi tơƀrê mâu tơdroăng cheăng tơpui kâ, mơdêk ki rơdêi ki  nhoăm dêi tơnêi têa cho tơdroăng pêi ki kal dêi kơvâ tơpui kâ.