Hâi lơ 12/1, pôa Trần Lưu Quang, Ngế pro xiâm phŏ hnê ngăn tơnêi têa lăm pôu, hbru tơmeăm Têt ăm mâu kăn ƀô̆ , mâu lêng, rơpŏng ai hnoăng, rơpŏng kơtiê a  kong pơlê Ninh Thuận. A Đông Tơkăng kong Phước Diêm, Ngế pro xiâm phŏ hnê ngăn tơêi têa rơkâu mâu tơdroăng ki lĕm ăm mâu kăn ƀô̆, mâu lêng dế pêi hnoăng cheăng.

Pôa Trần Lưu Quang  pơkâ thế mâu kăn ƀô̆, mâu lêng  pơtối kơdo mơ-eăm, pơtối rak vế pêi pro mâu hnoăng hiăng châ pêi tơƀrê,  pơtối ‘’Hnê kuăn pơlê, a chê ƀă kuăn pơlê tung pơlê cheăm’’, Kring vế tơniăn hnoăng pơkuâ tơnêi têa tói tơkăng kong , chuăn têa kơxĭ.

Troh lăm pôu jâ nôu Việt Nam khên tơnôu Lê Thị Hư, ối a cheăm Cà Ná, tơring Thuận Nam, Ngế pro xiâm phŏ hnê ngăn tơnêi têa kơ-êng rơkâu ivá ƀă tơdroăng rêh ối rêm hâi dêi Jâ Nôu Việt Nam, púi vâ  ngế nôu mo lĕm châ, rơtế ƀă dêi kuăn cháu tơdah Têt hơniâp ro, tơkŭm dêi rơpó, hơniâp lĕm.

Pơtối mê, Ngế pro xiâm phŏ hnê ngăn tơnêi têa hiăng lăm pôu hbru tơmeăm Têt ăm 200 ngế kŏng nhân , mơngế pêi cheăng ki ối kơtiê xơpá a Kŏng ti veăng tơlo liăn Cánh Đồng Việt , Pơlê kong kân Hồ Chí Minh.