Klêi kơ’nâi troh pơlê kong xiâm Dakar, Kŏng hoa Senegal, pôa Trần Thanh Mẫn, Kăn xiâm hnê ngăn Kuô̆k hô̆i ƀă kơdrâi pôa rơtế Khu râ kăn xiâm tơnêi têa pin hiăng ai roh trâm mâ, tơpui tơno bă kăn ƀô̆ Kăn teăng mâ, mơngế Việt Nam a kong têa kố, vâ pơtâng tối ‘na tơdroăng cheăng mơngế Việt Nam a kong têa ê tung rơxông nếo.

Tung roh lăm pôu pêi cheăng păng ‘nâng Kŏng hoa Senegal roh kố, pôa Trần Thanh Mẫn ƀă Kơdrâi pôa rơtế Khu râ kăn teăng mâ râ kăn xiâm tơnêi têa pin kô ai mâu roh trâm mâ tơpui tơno ƀă khu râ kăn xiâm dêi Kŏng hoa Senegal; veăng Leh kĭ tơkêa mơ-éa ki kal tơrŭm cheăng pơla péa Kuô̆k hô̆i; Veăng leh tối tơbleăng mơjiâng Khu kăn kuô̆k hô̆i râ má môi nhŏng o Việt Nam – Senegal; Veăng tơpui tơno troăng hơlâ luât ‘na mơdêk tơrŭm pêi chiâk deăng, tê mơdró, mơ’no liăn cheăng Việt Nam – Senegal.