Hâi lơ 10/4, tung hneăng lăm pôu tơnêi têa Kŏng hoa Yân chuh Nhân yân Lếo, pôa Võ Văn Thưởng, Kăn xiâm hnê ngăn tơnêi têa Kŏng hoa Xah hô̆i chuh ngiah Việt Nam hiăng tơpui tơno ƀă Kăn xiâm hnê ngăn Đảng, Kăn xiâm hnê ngăn kong têa Lếo Thongloun Sisoulith. Tung chôu phut sôk ro tơrŭm dêi rơpó, péa ngế kăn hiăng tơpui khât ƀă tối tơdrăng ‘na mâu troăng vâ pêi, tơdroăng vâ mơdêk pêi tung tâi tâng tơdroăng tơrŭm cheăng.

Tối nhên tung pơla lâp plâi tơnêi ƀă kơpong dế ai tơdroăng ôh tá tơniăn môi tiah dế nôkố, péa tơnêi têa thế mơdêk tơpui tơno túa pêi cheăng, tơrŭm krá ƀă dêi rơpó, kơjo kum dêi rơpó tơkâ luâ mâu tơdroăng pá pơloăng pá mơnúa. Ing mê, péa ngế kăn tối nếo troăng rơhlâ pơkâ dêi péa tơnêi têa cho ngăn nhoăm ƀă pêi ahdrối tơdroăng ‘mâi mơnhông, thăm mơdêk tơrŭm ki kân, môi tuăn ƀă tơrŭm tung tŭm tơdroăng cheăng pơla Việt Nam - Lếo; pơtối tơkŭm tơbleăng pêi tơƀrê mâu tơdroăng hiăng tơhrâ pơla mâu kăn dêi péa tơnêi têa, xuân môi tiah pơla mâu khu xiâm, kơvâ cheăng a tíu xiâm ƀă kong pơlê; mơdêk tơpui ‘na mâu tơdroăng ki kal, mơdêk mâu rôh lăm pôu dêi rơpó, trâm mâ tơrá mâu kăn xiâm ƀă rêm râ.