Tung roh lăm pôu pêi cheăng kong têa Lếo, kơxo hâi lơ 11/4, pôa Võ Văn Thưởng, Kăn xiâm hnê ngăn tơnêi têa hiăng troh lăm pôu pêi cheăng khu râ kăn xiâm pơkuâ dêi kong têa Lếo. Mê cho mâu kăn: pôa Choummaly Sayasone; Kăn xiâm pơkuâ hnê ngăn Đảng, Kăn xiâm hnê ngăn Đảng kong têa Lếo, Kăn xiâm hnê ngăn kong têa Lếo; pôa Bouñhang Vorachith, Kăn xiâm pơkuâ hnê ngăn Đảng, Kăn xiâm hnê ngăn tơnêi têa Lếo ƀă pôa Thongsing Tham Mavong, Ngế pro xiâm hnê ngăn Chin phuh Lếo.

Pôa Võ Văn Thưởng, Kăn xiâm hnê ngăn tơnêi têa tối phiu ro châ trâm mâu pú, pú hmâ, mơngế chiăng ton hơnăm dêi khu râ kăn pơkuâ ƀă kuăn pơlê Việt Nam; tá hiâm mơno mơnê mâu khu râ kăn pơkuâ kong têa Lếo hiăng pleăng hên ƀă veăng kum kân kĭn tung tơdroăng kum ăm tơrŭm cheăng ôh tá pơ’lêh, tơrŭm môi tuăn ki a’ngêi tâ pơla Việt Nam ƀă Lếo xuân môi tiah đi đo tơmâng, tŏng kum ăm tơdroăng mơnhông tŭm túa dêi tơrŭm cheăng nhŏng o ƀă tơrŭm pơla péa tơnêi têa.

Kăn xiâm hnê ngăn tơnêi têa tối loi tơngah, ing pơkuâ rơkê dêi Đảng ƀă kuăn pơlê kăch măng Lếo, tơnêi têa Lếo rĕng tơkâ hluâ pá puât, rế hía rế mơdêk tơniăn krê, pơkuâ xêh, mơnhông tơtêk, kuăn pơlê Lếo nhŏng o rế hía rế phâi hơtô ƀă hơniâp lĕm.