Tung ƀai pơchuât, péa ngế kăn pơkuâ pơrá tối rơdêi, ƀă mâu tơdroăng ki pêi pro châ tơƀrê hâk tơngăm tung tơrŭm cheăng pơla péa tơnêi têa tung plâ tơdế chal hdrối nah, malối cho sap ing tơdroăng ki ƀlêi chiâng dêi rôh lăm pôu kố, tơrŭm cheăng pơla péa tơnêi têa kô mơnhông mơdêk troh a troăng ki nếo, 50 hơnăm pơtối dêi tơrŭm cheăng péa tơnêi têa kô bâ eăng tâ.

Pôa Võ Văn Thưởng, kăn xiâm hnê ngăn tơnêi têa hơ’muăn tối mâu tơdroăng ki kal tung tơrŭm cheăng Việt Nam – Australia, tối nhên tá hâi la lâi tơrŭm cheăng pơla péa tơnêi têa krá tơniăn ƀă mơnhông lĕm môi tiah nôkố, tơdrêng a mê hlối  tối Australia đi đo tơmâng ngăn kum liăn ODA ăm Việt Nam, veăng kum kơhnâ tung mơnhông mơdêk cheăng kâ rêh ối pơlê pơla, mơdêk tơdroăng reh ối dêi kuăn pơlê Việt Nam.

Ngế ki pơkuâ tâi tâng hnoăng Australia tối nhên tơdroăng ki hâk tơngăm ai ngế pú, kong têa tơrŭm cheăng loi tơngah ƀă a chê môi tiah Việt Nam. Péa tơnêi têa dế rơtế ƀă dêi rơpó pêi pro hơ’lêh troăng ngăn tơdjuôm tung kơpong Ấn Độ Dương-Thái Bình Dương, cho kơpong tơniăn, kro mơdrŏng, tíu ki hnoăng pơkuâ ƀă mâu luât lâp plâi tơnêi châ loi nhuô̆m.