A rôh tơdah, pôa Võ Văn Thưởng - Kăn xiâm hnê ngăn tơnêi têa rơkâu Kăn teăng mâ hiăng pê klêi hnoăng cheăng tơná tung pơla pêi cheăng a Việt Nam; Khĕn kơdeăn khât hnoăng veăng ‘no tơƀrê dêi Kăn teăng mâ pêi cheăng trâu rơdâ tâ tơrŭm pơla péa pâ Việt Nam - Pakistan tung mâu hơnăm hdrối mê hía nah, malối tơrŭm tơkŭm pêi hên tơdroăng cheăng ai pơxúa drêng troh péa tơnêi têa tơbâ 50 hơnăm hâi mơjiâng tơrŭm tơpui kâ a hơnăm 2022.

Kăn xiâm hnê ngăn tơnêi têa pơkâ thế péa pâ mơdêk tơpui tơno tơrá mâu kăn rêm khu xiâm, kơvâ cheăng, kong pơlê, mâu khu mơdró, khu tơrŭm cheăng, trâm tơpui tơno ƀă kuăn pơlê ƀă khu ki rơkê vâ thăm mơdêk tâ nếo ki hlê plĕng dêi rơpó, tơrŭm krá pơla Việt Nam - Pakistan.

Péa pâ kal veăng kum pêi tơ-ƀrê tâ nếo tơrŭm cheăng tung mâu kơvâ tê mơdró, ‘no liăn cheăng, mơdêk tâ nếo pê lo liăn ing tê mơdró tơmeăm pơla péa pâ.