Teăng mâ mâu kăn kong têa ối tung ASEAN, Kăn teăng mâ Indonesia – tơnêi têa bro kăn xiâm hnê ngăn ASEAN hơnăm 2023, pơtroh rơkong rơkâu ƀă kơ-êng dêi Kăn pơkuâ Indonesia ƀă mâu kong têa ASEAN troh pôa Võ Văn Thưởng, kăn xiâm hnê ngăn tơnêi têa. Kăn teăng mâ tối rơdêi tung 28 hơnăm hdrối nah, Việt Nam hiăng cho ivá kal khât tung tơdroăng ki mơdêk tơrŭm ƀă hnoăng cheăng tíu xiâm dêi ASEAN xuân môi tiah tung mơjiâng Troăng ngăn Pơlê pơla ASEAN klêi kơ’nâi hơnăm 2025.

Ki rơdêi mơdêk GDP hơnăm 2022 dêi Việt Nam a kơlo 8,02% kô pro tơ’nôm ivá ăm mơnhông mơdêk cheăng kâ kpong. Kăn teăng mâ Indonesia, teăng mâ Kăn teăng mâ mâu kong têa ASEAN, tơhrâ, mâu Kăn teăng mâ kô môi tuăn ƀă veăng kum tơƀrê vâ mơdêk tâ nếo tơrŭm cheăng pơla Việt Nam ƀă mâu kong têa ASEAN. Tơdrêng amê hlối tối loi tơngah, xua tơdroăng pơkuâ rơkê plĕng dêi kăn xiâm hnê ngăn tơnêi têa, tơrŭm cheăng pơla Việt Nam ƀă mâu kong têa ki tơrŭm cheăng tung ASEAN kô rế hía rế tơrŭm ƀă mơnhông mơdêk rơdêi, trâu rơdâ, veăng kum kal khât ăm tơdroăng ki rak vế hơniâp lĕm, gâk kring, tơniăn tung kơpong.