Kăn xiâm hnê ngăn tơnêi têa ăm ‘nâi, tung pơla achê kố, Kăn xiâm hnê ngăn tơnêi têa ƀă Kăn xiâm pơkuâ kong têa Mông Cổ hiăng ai hên rôh trâm mâ tơpui tơno ƀă dêi rơpó pơla péa pâ, ing mê, thăm tơrŭm krá loi nhoăm tơdroăng kal kí ƀă mơdêk tơrŭm cheăng péa pâ. Phiu ro drêng hlo tơrŭm cheăng kâ, tê mơdró pơla péa tơnêi têa châ tơƀrê, Kăn xiâm hnê ngăn tơnêi têa púi vâ kơxô̆ liăn châ xo ing tê mơdró péa pâ châ to a kơlo 200 rơtuh dollars, tâk péa hdroh tâng pơchông ƀă nốkố.

Kăn xiâm hnê ngăn tơnêi têa khĕn kơdeăn khât tơdroăng ki Tíu xiâm séa ngăn arak luât péa tơnêi têa hiăng pêi cheăng kĭ tơhrâ tơrŭm cheăng sap hơnăm 2014 ƀă hlo tơƀrê hên tơdroăng, ing mê veăng ‘no hnoăng a tơdroăng tơrŭm cheăng péa tơnêi têa. Hneăng lăm pôu rôh kố, péa Tíu xiâm séa ngăn arak luât hiăng tơbleăng hên tơdroăng tơrŭm pêi ki kal, veăng pro trâu rơdâ tơrŭm cheăng krá tâ pơla péa tơnêi têa.