Kơxo lơ 10/4, pôa Võ Văn Thưởng - Kăn xiâm hnê ngăn tơnêi têa hiăng troh pơlê kong xiâm Vientiane, pơxiâm rôh lăm pôu păng ‘nâng Kŏng hòa Yân chuh Nhân yân Lếo. Rôh lăm pôu Lếo dêi kăn xiâm hnê ngăn tơnêi têa mơhno tối tơdroăng ki môi tuăn rơdêi, tâi tâng dêi Việt Nam ƀă tơdroăng ki hơ’lêh nếo, ‘mâi mơnhông ƀă mơdêk cheăng kâ rêh ối pơlê pơla, mot tơrŭm ƀă lâp plâi tơnêi dêi kong têa pú cho Lếo.

Tung pơla pôu Lếo, pôa Võ Văn Thưởng ai rôh tơpui tơno rơtế ƀă kăn xiâm pơkuâ hnê ngăn Đảng, kăn xiâm hnê ngăn tơnêi têa Lếo châ hlo leh kĭ tơkêa hlá mơ-éa tơrŭm cheăng pơla mâu khu xiâm, kơvâ cheăng, kong pơlê dêi péa tơnêi têa. Kăn xiâm hnê ngăn tơnêi têa xuân ai mâu rôh trâm mâ tơpui tơno ƀă Ngế pro xiâm hnê ngăn kong têa ƀă kăn xiâm hnê ngăn Kuô̆k hô̆i Lếo; tơdah kăn xiâm hnê ngăn Măt trâ̆n tơnêi têa Lếo mơjiâng tơnêi têa, tơdah kăn xiâm hnê ngăn tíu xiâm Khu tơrŭm tơroâ Lếo – Việt Nam; tơkŭm po ôu kâ dêi kăn xiâm hnê ngăn Đảng, kăn xiâm hnê ngăn kong têa Lếo; pôu tíu pêi cheăng kăn teăng mâ tơnêi têa pin a Lếo ƀă trâm mâu kăn teăng mâ pơlê pơla mơngế Việt Nam a Lếo.