Kơxo hâi lơ 18/4, pôa Vương Đình Huệ Kăn xiâm hnê ngăn Kuô̆k hô̆i rơté ƀă mâu Kăn xiâm Kuô̆k hô̆i tơnêi têa pin hiăng lo ing pơlê kong xiâm Hà Nội, pơxiâm lăm pôu kong têa Cuba. Tung pơla hdrối nah, tơdroăng tơrŭm môi  tih hmâ, tơrŭm krá pơla Việt nam - Cuba  pơtối châ mơnhông ƀă mơdêk tung tâi tâng mâu ƀâng ai pơxúa ƀă khât tâ.

Hneăng hôp tơpui tê mơdró pơla Việt Nam - Cuba xêt sap khế 4/2020  ƀă hên tơdroăng tơhrâ tê mơdró nếo, pro tơ’lêi hlâu ăm tơdroăng tê mơdró pơla péa pâ. A  rôh lăm pôu Cuba, pôa Vương Đình Huệ kô ai mâu rôh tơpui tơno ƀă mâu kăn xiâm dêi Đảng - Tơnêi têa Cuba; veăng pêi tơdroăng kal kí - ngĕ thuât  tơbâ 60 hơnăm mơjiâng Vi ƀan Cuba rŭm môi tuăn ƀă peăng Hdroh Việt Nam ƀă tơbleăng pơxiâm  po leh mơhno túa lĕm tro Việt Nam a La Habana;  pôu ngăn Tíu pêi cheăng Teăng mâ, trâm tơpui ƀă mơngế Việt Nam a kong têa Cuba.