Kơxê hâi lơ 29/3, pôa Vương Đình Huệ, Kăn xiâm hnê ngăn Kuô̆k hô̆i hiăng pêi cheăng ƀă Khu xiâm tối ăm ‘nâi mâu tơdroăng nếo ai ƀă hyôh rơ’jíu ‘na tơdroăng pơ’lêh kơxô̆ dêi Việt Nam.  Kăn xiâm hnê ngăn Kuô̆k hô̆i khĕn kơdeăn tơdroăng hnê tối ‘na hyôh rơ‘jiu internet luât pơkâ, Khu xiâm tối ăm ‘nâi mâu tơdroăng nếo ai ƀă hyôh rơ’jíu hiăng kơhnâ tí tăng ‘nâi mâu tơdroăng ăm Chin phuh vâ pơ’lêh ki hlê, tơdroăng cheăng pêi tung hnê tối luât pơkâ tŏng kum dêi mâu kơ koan tơnêi têa.

Ing mê, tối ‘na luât pơkâ tŏng kum thế chă ngăn cho môi tơdroăng cheăng, môi hnoăng pêi dêi mâu kăn. Tung tơdroăng mơjiâng, pê klêi luât pơkâ, Khu xiâm tối ăm ‘nâi mâu tơdroăng nếo ai ƀă hyôh rơ’jiu hiăng ƀĕng ƀeăn, rĕng teăm tí tăng ‘nâi ăm Chin phuh vâ pơtroh ăm Kuô̆k hô̆i tơbleăng Luât pro tơniăn tung măng, Luât ‘mâi hơ’lêh, tơ’nôm a mâu tơdroăng Luât kơlo kơxô̆ vô tuyến điĕn cho Luât ‘na hyôh phôn. Nôkố, tơdroăng tơkêa Luât mơdró điê̆n tưh (‘mâi hơ’lêh) hiăng châ Kuô̆k hô̆i ăm hnê tối rôh apoăng, tiô tối hdrối Kuô̆k hô̆i kô tơbleăng a rôh hôp má 5 la ngiâ. Tơdroăng tơkêa Luât viễn thông (‘mâi hơ’lêh), xua Khu xiâm cho tíu pêi cheăng pơkuâ chêh  hiăng chêh ‘mot tung Tơdroăng mơjiâng luât, hơnăm 2023.