Kơxê lơ 15/1, pôa Vương Đình Huệ, Kăn xiâm hnê ngăn Kuô̆k hô̆i ƀă Khu râ kăn pêi cheăng Tơnêi têa hiăng lăm pôu, rơkâu Têt kăn ƀô̆, lêng Kŏng an kong pơlê Lào Cai. Pôa Vương Đình Huệ pơkâ thế tâi tâng kăn ƀô̆, mâu lêng kŏng an kong pơlê pơtối djâ troăng ahdrối, hlê plĕng pêi trâu hơngế ƀă tơkŭm pêi pro kơtăng Pơkâ Hneăng hôp roh má XIII dêi Đảng ƀă mâu pơkâ, mơgêi dêi Đảng ‘na mơjiâng khu kŏng an.

Kăn xiâm hnê ngăn Kuô̆k hô̆i pơkâ thế, khu Kŏng an kong pơlê Lào Cai mơnhông hnoăng ki xiâm tung mơjiâng Tâi tâng kuăn pơlê gâk kring Tơnêi têa; thăm pêi pro tơdroăng pơtâng hnê tối kuăn pơlê ƀă mơjiâng tơdroăng gâk kring pơlê pơla, tŏng kum mơjiâng vâi krâ mâu hdroâng kuăn ngo kơpong hơngế, hơngo, kơpong tơkăng kong, kơpong pá puât ƀă hiâm mơno ‘’ôh tá lôi kơbố parŏng’’. Ki rơhêng vâ tối cho môi roh Têt tiô khôi hmâ vâi krâ nah kố thế tơniăn ăm kuăn pơlê tơdah Têt tơniăn, châ tơdah môi rơnó Hơngui hơtô, hơniâp ro.