A roh tơpui phôn mê, péa ngế Kăn xiâm hiăng vâ môi tuăn thăm mơdêk tơrŭm cheăng nhŏng o tiô khôi hmâ ƀă kong têa Kul, tá hnoăng cheăng dêi Đảng, Kuô̆k hô̆i, Chin phuh ƀă ăm kuăn pơlê châ trâm, tơpui tơno dêi pó, maluâ, kal athế thăm mơdêk hneăng trâm mâ khu râ kăn xiâm Đảng, hneăng hôp roh má 13 Vi ƀan tơrŭm cheăng pơla Việt Nam ƀă Kul ‘na tơrŭm cheăng kâ, pêi lo kế tơmeăm, tê mơdró, mơ’no liăn cheăng, túa lĕm tro, khoa hok kih thuât, roh hôp mâu kong pơlê ki ố achê tíu tơkăng kong ƀă dêi pó.

Péa pâ kô pơtối thăm mơdêk tơrŭm cheăng châ tơƀrê pơla Khu xiâm pơkuâ ngăn lêng, Khu xiâm ngăn Kŏng an, Khu xiâm tơpui kâ Việt Nam ƀă Khu xiâm ngăn lêng, Khu xiâm ngăn kăn sat, Khu xiâm ngăn ‘na cheăng mâu kăn, Khu xiâm tơrŭm tơpui kâ ƀă Khu tơrŭm cheăng lâp plâi tơnêi dêi Kul; rơtế tơrŭm cheăng thăm mơdêk hnoăng cheăng a kơpong tíu tơkăng kong dêi péa pâ tơnêi têa chiâng kơpong ki hơniâp lĕm ƀă mơnhong. Pôa Samdech Techo Hun Sen pói rơhêng vâ péa to kong têa rơtế tơrŭm dêi pó krá tơniăn, veăng kum ăm kong têa Lếo pro pơkuâ xiâm hneăng pro Kăn xiâm hnê ngăn ASEAN, Kăn xiâm hnê ngăn AIPA 2024 ƀă thăm mơdêk, ‘mêi mơnhông tơrŭm, cheăng ƀă mâu kong têa tung ASEAN.