Klêi kơ’nâi Leh tơdah păng ‘nâng, pôa Vương Đình Huệ, Kăn xiâm hnê ngăn Kuô̆k hô̆i tơkŭm tơpui tơno ƀă pôa Jussi Halla-Aho, Kăn xiâm hnê ngăn Kuô̆k hô̆i Kŏng hoa Phần Lan. Hdrối mê, pôa Jussi Halla-Aho hiăng troh ‘măn hơvĭng reăng a tíu chôu ‘măn poăng Pôa Hồ Chí Minh, Kăn xiâm hnê ngăn tơnêi têa hneăng hdrối.

Tung roh lăm pôu pêi cheăng, pôa Jussi Halla-Aho kô trâm mâ pôa Phạm Minh Chính, Ngế pro xiâm hnê ngăn Chin phuh; koh trâm mâ jâ Trương Thị Mai, Kăn pơkuâ tơdroăng cheăng Đảng, Kăn pơkuâ tơkŭm po tơdroăng cheăng tơnêi têa ƀă ai mâu tơdroăng pêi pa kong ki ê. Ing roh lăm pôu pêi cheăng dêi pôa Jussi Halla-Aho, Việt Nam pói vâ mơdêk tâ mê nếo tơrŭm cheăng pơla Kơ koan mơjiâng pro luât péa tơnêi têa, djâ tơrŭm Kuô̆k hô̆i râ má môi pơla péa pâ rế hía rế châ tơƀrê, păng ‘nâng; mơjiâng troăng po rơdâ tơrŭm cheăng pơla péa tơnêi têa tung hên kơvâ cheăng ki ê, ki rơhêng vâ tối cho mơdêk châ tơƀrê tơrŭm cheăng kâ pơla péa tơnêi têa; thăm tơrŭm cheăng ƀă pro krá tơniăn tơrŭm cheăng a mâu hneăng hôp rêm pâ môi tiah Khu lâp kong têa, Khu tơrŭm Kuô̆k hô̆i râ má môi lâp plâi tơnêi.