Pôa Vương Đình Huệ tối rơdêi, Việt Nam pói vâ péa pâ thăm tê mơdró krá tơniăn, tơdâng tơ’mô, pro tơ’lêi hlâu rôe hên tơmeăm khoăng pêi lo ing chiâk deăng dêi Việt Nam troh a kong têa Australia ƀă tơrôu. Pôa Vương Đình Huệ pơkâ thế Kăn xiâm pôu râng tâi tâng hnoăng cheăng kong têa Australia tơmâng, thăm pêi pro rơdêi tơrŭm cheăng tung kơvâ pêi cheăng, ki rơhêng vâ tối po rơdâ tơrŭm cheăng ‘na kih thuât pêi chiâk deăng ƀă pêi cheăng hneăng pơtê; thăm pêi pro rơdêi tơrŭm cheăng pơla mâu kong pơlê dêi péa tơnêi têa.

Pôa Vương Đình Huệ mơnê kong têa Australia tŏng kum Việt Nam châ mot tung khu tơrŭm dêi Hô̆i đông pơkuâ hnoăng kuăn mơngế Khu lâp kong têa hneăng hơnăm 2023 – 2025, rơtế kum hên troăng tơmiêt tơdâng tung mâu hneăng hôp tơpui tơno kơpong ƀă lâp plâi tơnêi. Kăn xiâm pôu râng hnoăng kong têa Australia David Hurley môi tuăn ƀă rơkong tơpui tối dêi Kăn xiâm hnê ngăn Kuô̆k hô̆i ‘na mâu kơvâ cheăng tơrŭm cheăng nếo pơla kơ koan mơjiâng luât péa tơnêi têa, tối kố, cho mâu kơvâ ki kal, djâ pơxúa ăm tŭm péa pâ, xua mê, kal tơmâng troh mâu kơvâ kố, hriâm túa ki rơkê tơtro ki ton nah ƀă xo mê pro tíu hgiên krá tơniăn vâ thăm tơrŭm pơla péa pâ tung la ngiâ./.