Kơxo lơ 17/4, a Hngêi Kuô̆k hô̆i, pôa Vương Đình Huệ, kăn xiâm hnê ngăn Kuô̆k hô̆i trâm mâ khu kăn kơdrâi, khu chêh hlá tơbeăng ki kơhnâ rơkê. Hên mâu ƀai chêh chêh hlá tơbeăng dêi mâu ngế cheăng tung Kâu lak ƀô̆ Chêh hlá tơbeăng vâi kơdrâi Việt Nam ai ki kơnía, tối tơbleăng nhên tơdroăng rêh ối, veăng kum tơpui tối leăng tung rôh hơ’lêh nếo, mơnhông mơdêk tơnêi têa, hên ƀai chêh hiăng châ kâ pri tung mâu rôh tơ’noăng hlá tơbeăng dêi kong pơlê, khu xiâm, kơvâ cheăng, khu lêng kring vế tơniăn ƀă Pri hlá tơbeăng tơnêi têa.

Tơpui a rôh trâm mâ, pôa Vương Đình Huệ, kăn xiâm hnê ngăn Kuô̆k hô̆i tối rơdêi, Kuô̆k hô̆i mâu hneăng pơrá ngăn nhuô̆m hnoăng cheăng dêi hlá tơbeăng, malối cho mâu kơ koan kuăn pơlê pôk sap ing Tơnêi têa troh kong pơlê xuân ai mâu kăn teăng mâ ăm mâu kơ koan chêh hlá tơbeăng. Tung la ngiâ, Kăn xiâm hnê ngăn Kuô̆k hô̆i pơkâ thế mâu ngế ki chêh hlá tơbeăng tơnêi têa pin kal pơkâ tŭm, trâu rơdâ túa tơmiât, hlá tơbeăng cho pháu hnêa, cho kế tơmeăm ki xiâm dêi Đảng tung mâu hiâm mơno tơmiât.

Drêng kố, Kăn xiâm hnê ngăn Kuô̆k hô̆i rơkâu mâu ngế ki chêh hlá tơbeăng kơdrâi ƀă Kâu lak ƀô̆ Chêh hlá tơbeăng vâi kơdrâi Việt Nam “đi đo hơnăm 20” môi hiâm mơno dêi ngế lêng, Ƀok thái pơkeăng Đặng Thùy Trâm; đi đo rak vế châ “Hiâm mơno bâ,  tuăn hiâm krúa, loăng chêh rơkê” ƀă cho “mâu reăng xut ƀă meăm thep”.