Cho môi tung mâu cheăm ki nếo châ tơmot klêi kơ’nâi tơkŭm 3 to cheăm ton nah cho: Mỹ Chánh, Mỹ Thành ƀă Mỹ Cát, cheăm An Lương, kong pơlê Gia Lai dế nôkố ai tơnêi tíu 54 km karê ƀă pơ’leăng mâ mơngế ai lối 6.000 ngế. Tơnêi tíu kân rơdâ tiah mê, kuăn pơlê kơdrâm kơdrĕng, khu râ kăn cheăm An Lương hiăng thâ rĕng teăm rak tơniăn ăm tơdroăng ki mơjiâng khu cheăng ƀă pơkâ pêi pro mâu hnoăng cheăng ki vâ gum ăm kuăn pơlê. A tíu xiâm rak ngăn ‘na tơdroăng cheăng ƀă pơkâ pêi pro mâu hnoăng cheăng cheăm, 3 khu ki chêh bro hlá mơ-éa hiăng châ kơjo gum cheăng kơxô̆ ƀă châ pơkâ pêi pro tiô troăng hơlâ ‘na điê̆n tưh. Mâu tơdroăng ki ai tơdjâk troh tơdroăng rêh kâ ối dêi kuăn pơlê, môi tiah khai sanh, chêh tối tơdroăng ai mơngế hlâ, vêh mơnhên tối pơrá hiăng châ tơdah xo ƀă rĕng bro klêi ăm tơná kuăn pơlê.

Môi tung mâu tơdroăng ki ‘ló hâk mơnê kân tung túa cheăng cheăm mê cho kal athế hlê plĕng, tŏng gum hnê tối vâi krâ-nhŏng o tung tơdroăng ki kal chêh bro hlá mơ-éa. Pôa Võ Thanh Hoàng, Kăn hnê ngăn Vi ƀan cheăm An Lương ai tối tiah kố:

“Tơkâ luâ 1 khế pêi tơdroăng cheăng, ngin hiăng vêh mơnhên tiah kố, ƀă hnoăng cheăng dêi kăn ƀô̆ đi đo djâ troăng ahdrối vâ hlê plĕng nhên ăm kuăn pơlê, tơtro tiô hiâm mơno dêi kuăn pơlê. Cheăm dế tŏng gum hên ƀă mơ’no liăn, kế tơmeăm hên mâu tơmeăm khoăng. Mâu cheăm ki ê dế pêi pro hên mâu hnoăng cheăng ƀă mơ’no liăn rôe mâu tơmeăm khoăng. Xuân u ối mâu cheăm ki tá hâi teăm rôe tŭm kơmăi ki rah kơxô̆ la cheăm ki ai kuăn pơlê kơdrâm mê, xua mê, cheăm hiăng rôe kơmăi kơmok ki rah kơxô̆ tiô kơ ahdrối, kơ’nâi, mơhno tối ‘na túa lĕm tro. Ngế ki lâi prôk ahdrối kố rah xo kơxô̆ ahdrối, prôk kơ’nâi kố rah xo kơxô̆ mơ’nui, ing mê, mơjiâng chiâng túa pêi cheăng ki tơniăn”.

Kơnôm ing tơdroăng ki pơhlêh kố hiăng châ kuăn pơlê mơnhên tối ‘ló khât. Pôa Lê Ngọc Trọng, kuăn pơlê a cheăm An Lương, ai 2 xoh lăm chêh bro  hlá mơ-éa tung khế ki kố tối ăm ‘nâi:

“Kăn ƀô̆ kơ koan hnê tối kuăn pơlê pêi pro rĕng, tơdrêng mâu hô sơ dêi kuăn pơlê pơrá hiăng châ chêh bro, klêi tơdrêng tung hâi ki mê hlối”.

A cheăm kong ngo Canh Vinh, klêi kơ’nâi tơ’mot mâu cheăm kơxô̆ tơnêi tíu vâ chê 260km karê, xua ai hên koing kế, ngo ngối, pơlê cheăm,  hdroâng kuăn ngo, pơlê ối a hơngế, xua mê, tơdroăng ki pro hlá mơ-éa ki nếo ga achê ƀă kuăn pơlê mê cho tơdroăng ki tô tuăn ó kân khât dêi khu kăn pơkuâ hnê ngăn. Pôa Dương Hiệp Hoà, Kăn hnê ngăn cheăm Canh Vinh tối ăm ngin ‘nâi, cheăm dế pêi pro tiô túa cheăng ki nếo, maluâ mâu pơlê cheăm ki hơngế ing tơdế cheăm vâ gum ăm vâi krâ-nhŏng o châ tơ’lêi hlâu tâ tung pro hlá mơ-éa:

“Xua ing tơdroăng ki pá puât mê râ cheăm khoh chiâng hriăn pro tơdroăng ki tơniăn, mơjiâng pro mâu tíu ki vâ tŏng gum chêh pro hlá mơ-éa ăm kuăn pơlê. Ki ahdrối tâ cho mơjiâng môi tíu ki tơdah xo hlá mơ-éa dêi thôn Canh Hiển vâ gum ăm kuiăn pơlê ki ối a mâu thôn a hơngế môi tiah thôn Canh Hiệp, pơlê Canh Tiến. Klêi mê, pêi pro troh mâu tơdroăng ki mơnhên túa ki gum ăm kuăn pơlê. Tơdroăng cheăng ki hnê tối ƀă mâu tơmeăm khoăng ‘na kŏng ngê̆ kơxô̆ kô gum ăm mâu pơlê ki ối hơngế pro ti lâi vâ kuăn pơlê châ pro hlá mơ-éa, ƀă rĕng gum ăm kuăn pơlê”.

Ing tơdroăng ki achê ƀă kuăn pơlê mê, ối mơhno tối nhên hnoăng cheăng ki rơkê dêi mâu kăn ƀô̆. Nâ La Thị Huyền Giang, Kăn ƀô̆ xiâm ki tŏng gum ‘na hnoăng cheăng dêi cheăm Canh Vinh ai tối tiah kố:

“Drêng pơkâ pêi pro tiô 2 râ, á hlo thăm ai hên tơdroăng ki tơ’lêi, achê ƀă vâi krâ-nhŏng o ƀă kuăn pơlê a mâu thôn pơlê. Drêng troh lăm pêi cheăng, ai mâu vâi krâ-nhŏng o hiăng êng, krếo phôn, tơngah vâ chêh bro hlá mơ-éa a cheăm, ngế ki lâi tá hâi teăm nhên mê athế hnê tối, tơpui tơno ƀă vâi krâ-nhŏng o ƀă rơkong tơpui dêi kuăn ngo tơná pin mê ga hlâu tâ, tơdroăng cheăng tơ’lêi hlâu tâ há”.

Bu kơ’nâi 1 khế pêi hnoăng cheăng ki nếo mê khu kăn hnê ngăn 2 râ, kong pơlê Gia Lai hiăng vêh mơnhên tối hvêa chêng prôk ki ó rơdêi tung hnoăng cheăng chêh bro hlá mơ-éa, tơdroăng xúa kơxô̆ kŏng ngê̆, ki rơhêng vâ tối mê cho ki tơƀrê tung hnoăng chêh bro hlá mơ-éa tơkâ luâ ing tơdroăng ki tơpui mơnhên. Tiô Cổng Dịch vụ Quốc gia, Gia Lai dế nôkố ối má 6 tung 34 kong pơlê, pơlê kong kân ‘na kơlo, kơdró ki tŏng gum ăm kuăn pơlê ƀă khu mơdró. Pôa Hồ Quốc Dũng, Ngế cheăng Tíu xiâm Đảng, Kăn pơkuâ hnê ngăn Đảng uỷ kong pơlê Gia Lai, ai tối tiah kố:

“La ngiâ kố ah kô pêi pro tiô troăng hơlâ vâ pơtối xing xoăng tơdroăng cheăng troh a cheăm. Mâu hnoăng cheăng dêi Tíu xiâm ăm phep hnoăng cheăng dêi râ kong pơlê la hlo cheăm hiăng chêh bro hô sơ kơtăng ó khât tâ, mê xuân chiâng pơcháu hnoăng cheăng ăm râ cheăm. Pakĭng mê, xuân u ối hên mâu cheăm ki ối trâm hên pá puât, kăn ƀô̆ cheăm dế nôkố ai 3 to lâm kăn ƀô̆, kăn ƀô̆ kong pơlê djâ vêh akố, tơring pơtroh ăm kăn ƀô̆ a cheăm. Kăn ƀô̆ a cheăm hdrối nah hiăng ai hên mâu ngế ki tá hâi hlê plĕng tơdroăng cheăng, xua ti mê, vâ pro hmâ ‘na tơdroăng cheăng ki kố kal ai chôu phut, hâi khế ki mơhriâm, hnê mơjiâng tung la ngiâ ah vâ khoh chiâng pêi pro mâu hnoăng cheăng tơná”.

Tơdroăng ki pơhlêh nếo, rah xo iâ mơngế, achê ƀă kuăn pơlê dêi râ cheăm a Gia Lai klêi kơ’nâi 1 khế pơkâ pêi pro túa cheăng 2 râ mê ăm hlo nhên ki tơƀrê dêi troăng tơdjâ, troăng hơlâ ki kân dêi Đảng. Xuân ối hên mâu hnoăng cheăng athế pêi pro, hên tơdroăng ki kreăng, tơvâ tơvân kal athế vêh mơnhông, la ƀă hiâm tuăn “bu athế tơno tơnêng” tơdrêng ƀă tơdroăng pơkuâ ngăn, rơtế pêi pro dêi Khu kăn pơkuâ hnê ngăn Đảng uỷ, Vi ƀan hnê ngăn kong pơlê Gia Lai, khu kăn hnê ngăn cheăm tung túa cheăng ki nếo kô rế hiá rế krá rơdêi, tơdâng ƀă hnoăng cheăng dêi chal nếo.