Hlá mơ-éa pơkâ hdrối mê cho tơmeăm mơnhông ‘na tuăn rơkê dêi pú hên, mơ-eăm môi tuăn dêi rơpó vâ kâi tơkâ luâ xơpá dêi Điện Biên kơ’nâi 3 hơnăm riân sap hâi Ngế pro xiâm hnê ngăn Chin phuh kĭ tơdroăng cheăng mơjiâng pơkâ hdrối kong pơlê.

Sap ing mê ta troh hơnăm 2030, kong pơlê Điện Biên xuân châ tơdroăng pơkâ hdrối mê chiâng môi tung mâu tíu ki xiâm ôm hyô, tê mơdroăng, mơnhông ‘na khăm pơlât dêi kơpong, rơtế ƀă 4 tơdroăng ki xiâm mơ-eăm pêi, 3 kơpong cheăng kâ ƀă 4 tơdroăng ki mơnhông tơƀrê tung pêi cheăng, xo tơdroăng ‘no liăn mơjiâng tơmeăm khoăng pro troăng prôk ahdrối cho tơƀrê.

Tơbleăng hnê mơhno a hneăng hôp tơbleăng, pôa Trần Hồng Hà - Ngế pro xiâm phŏ hnê ngăn Chin phuh ai tối tiah kố Pơkâ hdrối kong pơlê kô pro xiâm ki rơdêi tơƀrê nếo ăm Điện Biên. Laga, kố nếo bú rôh pơxiâm apoăng, Điện Biên kal tơmâng pêi tơƀrê tơdroăng Pơkâ hdrối troăng vâ pêi tơdroăng mơnhông cheăng kâ lĕm tơbrê, krá tơniăn, tơxâng ƀă tơmeăm khoăng hiăng ai hlâu.