Kố cho kong pơlê má 31 dêi lâp tơnêi têa ƀă cho kong pơlê apoăng dêi kơpong Tây Nguyên kêi đeăng hô sơ mơnhên pơkâ pêi râ kong pơlê. Pơkâ pêi kong pơlê Dak Nông tối 7 troăng tơmiêt pêi mơnhông mơdêk, pơkâ pêi troh hơnăm 2030 mơjiâng kong pơlê Dak Nông chiâng kong pơlê ai tơdroăng cheăng kâ châ tơƀrê – krá tơniăn dêi kơpong Tây Nguyên, cho Tíu xiâm kơmăi kơmok bôxit – nhôm dêi tơnêi têa, tíu xiâm pơkuâ on tơhrik ki vêh pro dêi kơpong Tây Nguyên; Mơnhông mơdêk ôm hyô ối pơtê, loăng pơlái kong kế tiô tơdroăng ki tơ’lêi ‘na kong prâi, loăng pơlái kong kế ki lĕm mơnâ mâ ngăn; Mơnhông mơdêk pêi chiâk deăng tiô troăng kŏng nghê̆ rơxông nếo, krá tơniăn.

Tơmiêt pêi troh hơnăm 2050, mơ-eăm Dak Nông chiâng kong pơlê mơnhông mơdêk dêi kơpong Tây Nguyên, ai kơlo pêi lo liăn rêm pơ’leăng mâ mơngế dêi kuăn pơlê hên tâ tơdâng tơdjuôm lâp tơnêi têa. Dak Nông pơkâ tơmiêt pêi mơjiâng 3 tơdroăng ki châ tơƀrê tung tơdroăng mơnhông mơdêk, ‘na: Tôh hôp kơmăi kơmok bôxít – nhôm – pro meăm ƀă kơmăi kơmok krúa lĕm; Pêi chiâk deăng krá tơniăn kâi trâng ƀă kong prâi hơ’lêh ƀă kơchơ mơdró; Ôm hyô ngăn loăng pơlái kong kế, ối pơtê ƀă loăng pơlái kong kế, pơlê pơla ƀă kơdrum kiêp hmố lâp plâi tơnêi UNESCO. Kong pơlê mơjiâng 11 tíu kơdrâm kuăn pơlê rêh ối ối tung 3 kơpong ki xiâm, 4 tơdroăng cheăng kâ tiô mâu troăng kân tơnêi têa 14, 14C, troăng kân tơnêi têa 28 ƀă mâu troăng Đông – Tây. Dak Nông xuân pơkâ mơ’no 14 khu troăng pêi ki nhên mơhnhôk khu râ pêi pro pơkâ pêi.