Tiô pơkâ pêi pro, troh hơnăm 2050, kong pơlê Dak Lak chiâng kong pơlê ai kuăn kiâ kong, kong kế lĕm, khôi túa lĕm tro, tơdjêp, tơmiât pêi rơkê, cho tíu troh ki hâk vâ, tơxâng rêh. Troh hơnăm 2030, kong pơlê Dak Lak chiâng tíu troh ki má môi, toi tơmối ôm hyô tung tơnêi têa ƀă lâp plâi tơnêi; chiâng pơlê kong kơdrâm Ƀuôn Ma Thuột cho môi tíu mơnhông dêi kơpong Tây Nguyên, mot tơrŭm ƀă tơdjêp tiô troăng po ƀă kơpong ƀă lâp plâi tơnêi.

Xông tơpui hnê mơhno a Hneăng hôp, Ngế pro xiâm phŏ hnê ngăn tơnêi têa Trần Hồng Hà mơnhên, Dak Lak ai tíu ki kal, hên tơmeăm ivá kâi mơnhông, ai khôi túa lĕm tro hên. Pơkâ pêi pro kong pơlê Dak Lak cho môi troăng prôk ki nhên troăng hơlâ kân dêi Khu xiâm kal kí a Pơkâ kơxô̆ 23 ‘na troăng prôk la ngiâ mơnhông cheăng kâ – rêh ối pơlê pơla ƀă tơniăn cheăng lêng, gâk kring kơpong Tây Nguyên troh hơnăm 2030, tơmiât pêi troh hơnăm 2045.