Pơlê kong kân Hồ Chí Minh nếo pơxiâm po Leh mơdĭng Têt Việt Quý Mão hơnăm 2023 ƀă dó inâi ‘’Pơlê kong kân á hâk vâ’’. Tơkŭm po sap ing kố troh hâi lơ má 5 Têt, Leh mơdĭng Têt Việt Quý Mão hơnăm 2023 eăng má môi ƀă tíu ‘’Kơphô̆ Pôa ki chêh chư chal ton nah’’ ƀă dâng 50 ngế pôa ối nếo rơtế loăng chêh têa mâk mơ-éa khêi ‘nân chêh chư ăm tơmối. Tíu leh mơdĭng châ pro lĕm xua lối 100 xiâm loăng mai trĭng pro lĕm mơnâ mâ ngăn kum tơmối tâ tơdroăng rơnó Hơngui a Pơlê kong kân dó inâi Pôa Hồ.

Pakĭng mê, a kố xuân tơkŭm po mâu tơdroăng phiu ro hâi Têt môi tiah: Meăn um hlá mơ-éa, pong rơgi loăng pro mơnâ mâ ngăn, kơchuâ um xeăng, tíu chôu ‘măn kơđĕng ki têk têa châu, tơmeăm ếo xŏn ƀă hía hé. A kố ối ai hên tơdroăng pleăng hnoăng cheăng, rak ngăn Têt ăm kuăn pơlê, môi tiah: Tơdroăng ‘’Roh rơxế rơnó Hơngui; djâ sinh viên vêh pơlê kâ Têt, ‘’Roh rơxế tơkŭm dêi pó’’ ăm kŏng nhân vêh pơlê xiâm, trâm mâ sinh viên tơdah Têt hơngế hngêi, ƀă hía hé.

A leh pơxiâm po, Khu tơkŭm po hiăng diâp kơxuô tơmeăm Têt troh vâi hdrêng ai tơdroăng rêh ối pá puât, vâi hdrêng kuăn tê xua pơreăng kân COVID-19.