Klêi kơ’nâi châ pôa Phạm Minh Chính, Ngế pro xiâm hnê ngăn Chin phuh kĭ Pơkâ mơnhên pơlê kong kơdrâm Kon Tum cho tíu kuăn pơlê rêh ối tê mơdró kơdrâm khu II ối tung kong pơlê Kon Tum a hâi lơ 10/1 pơla kố nah, Vi ƀan pơlê kong kơdrâm Kon Tum hiăng pơxiâm pêi pro hên pơkâ pêi ki nhên vâ pêi kêi đeăng, rak krá tơniăn mâu tơdroăng pơkâ ƀă xo têa kroăng Đăk Bla cho kki xiâm vâ mơnhông mơdêk tíu kơdrâm kuăn pơlê rêh ối tê mơdró. Vâ tơniăn pơkâ ‘na kơxô̆ pơ’leăng mâ mơngế rêh ối tung tíu kơdrâm kuăn pơlê rêh ối tê mơdró, pơlê kong kơdrâm Kon Tum thăm pêi pro rơdêi tơdroăng mơhnhôk mơ’no liăn cheăng, pêi pro mâu tơdroăng tơkêa bro, thăm rak krá tơniăn mơjiâng mâu kơpong, tíu pêi cheăng kơmăi kơmok vâ mơhnhôk kơxô̆ mơngế pêi cheăng.

Rơtế a mê kô kơjo mơ’no liăn pro hngêi trăng, troăng klông tiô troăng mơdêk ivá tơdjêp pơla 4 troăng pakĭng. Vâ châ mơnhên cho tíu kơdrâm kuăn pơlê rêh ối tê mơdró khu II a khế 1 kố nah, pơlê kong kơdrâm Kon Tum, kong pơlê Kon Tum hiăng kơjo kơxô̆ liăn mơ’no mơjiâng hngêi trăng troăng klông ƀă pêi pro tơdâng tơ’mô mâu troăng thăm mơnhông mơdêk cheăng kâ – rêh ối pơlê pơla.

Tơdroăng mơjiâng pơlê kong kơdrâm Kon Tum châ mơnhên cho tíu kơdrâm kuăn pơlê rêh ối rê mơdró khu II ối tung kong pơlê dế cho tơdroăng vâ pơlê kong kơdrâm thăm mơnhông mơdêk rơdêi.